AZƏRBAYCAN NEFTİNİN CEYHAN TERMİNALINA ÇATMASI MÜNASİBƏTİLƏ PREZİDENT İLHAM ƏLİYEVİN AZƏRBAYCAN XALQINA MÜRACİƏTİ
Dünən Azərbaycan nefti Ceyhan terminalına çatıbdır. Bu böyük tarixi hadisə münasibətilə bütün Azərbaycan xalqını ürəkdən təbrik edirəm.
Bakı-Tbilisi-Ceyhan neft kəmərinin tikintisi Azərbaycan üçün çox böyük əhəmiyyət kəsb edən hadisədir. Bu, Azərbaycanın uzunmüddətli inkişafını təmin edəcək, ölkəmizi zənginləşdirəcək, bizim iqtisadi potensialımızı daha da möhkəmləndirəcəkdir.
Azərbaycan çox sürətlə və dinamik şəkildə inkişaf edən ölkədir. Azərbaycanın çox gözəl perspektivləri, çox gözəl nəticələri var və şübhəsiz ki, ölkəmiz Bakı-Tbilisi-Ceyhan neft kəmərinin fəaliyyətindən çox böyük fayda əldə edəcəkdir. Hər bir vətəndaş bu müsbət dəyişiklikləri öz gündəlik həyatında hiss edəcəkdir.
Bakı-Tbilisi-Ceyhan neft kəməri ulu öndər Heydər Əliyevin adını daşıyır. Məhz Heydər Əliyevin təşəbbüsü ilə 1994-cü ildə başlanmış Azərbaycanın neft strategiyası bu gün ölkəmizin hərtərəfli inkişafına şərait yaradır. Onu da bilirsiniz ki, Türkiyə hökuməti Ceyhan terminalına da ulu öndər Heydər Əliyevin adını vermişdir. Beləliklə, Azərbaycan nefti Heydər Əliyev adına Bakı-Tbilisi-Ceyhan neft kəməri vasitəsilə Heydər Əliyev adına Ceyhan terminalına nəql edilibdir və bir neçə gündən sonra birinci tanker yola düşəcəkdir. Bu bir daha onu göstərir ki, ölkəmiz qarşıda duran bütün vəzifələri icra etməyə hazırdır və buna qadirdir.
1990-cı illərin çox ağır şəraitində müəyyən təzyiqlərə, təhlükələrə, təhdidlərə baxmayaraq, Azərbaycan xalqı öz siyasətindən dönmədi. Azərbaycan rəhbərliyi öz siyasətini cəsarətlə, müdrikliklə irəliyə aparırdı. Bu gün də belədir. İndi Azərbaycan qarşıda duran bütün vəzifələri həll etməyə qadirdir. Dünyanın ən böyük enerji layihəsi olan Bakı-Tbilisi-Ceyhan bu gün reallıqdır. Vaxtilə əfsanə kimi görünən bu layihə artıq gerçəklikdir. Bu ilin sonuna qədər Bakı-Tbilisi-Ərzurum qaz kəmərinin işə düşməsi Azərbaycanın hərtərəfli inkişaf etməsinə böyük xidmət göstərəcəkdir.
Bilirsiniz ki, indi dünyada və Avropada enerji təhlükəsizliyi məsələləri ön plana çıxır. Demək olar ki, gündəliyin ön planına çıxır. Bu baxımdan Azərbaycanın rolu getdikcə artacaqdır. Bu, bizə bir tərəfdən böyük iqtisadi mənfəət gətirəcək, digər tərəfdən, böyük siyasi kapital gətirəcəkdir. Azərbaycanla hesablaşırlar, Azərbaycanla məsləhətləşirlər. Bizim dünyadakı və Avropadakı mövqelərimiz möhkəmlənir. Müstəqil siyasət aparmağımızda heç bir problem yoxdur, heç bir çətinlik çəkmirik və ölkəmizi çox inamla və uğurla gələcəyə aparırıq.
Bu, böyük tarixi hadisədir. Bu, təkcə Azərbaycan üçün, bölgə üçün deyil, dünya əhəmiyyətli tarixi hadisədir.
Əlbəttə, biz hamımız istəyirik ki, Azərbaycanın qarşısında duran bütün problemlər tezliklə öz həllini tapsın. İlk növbədə, Ermənistan-Azərbaycan, Dağlıq Qarabağ münaqişəsi öz həllini tapsın. Biz bu münaqişənin həll olunmasında bütün imkanlardan istifadə edəcəyik. O cümlədən iqtisadi imkanlarımızdan, artan iqtisadi potensialımızdan və bütün başqa imkanlardan.
Mən Azərbaycanın qarşısında böyük problem görmürəm, gələcəyə çox nikbinliklə baxıram. Bakı-Tbilisi-Ceyhan neft kəmərinin reallaşması bir daha onu göstərir ki, Azərbaycan iqtidarı, rəhbərliyi ölkəni inamla idarə edir. Bizim siyasətimiz xalq tərəfindən bəyənilir, dəstəklənir və biz də çalışacağıq əlimizdən gələni edək ki, ölkəmiz daha da möhkəmlənsin, hər bir vətəndaş daha da yaxşı yaşasın, işsizlik, yoxsulluq tamamilə aradan qaldırılsın. Əlbəttə ki, bu işdə Bakı-Tbilisi-Ceyhan neft kəmərinin rolu müstəsna əhəmiyyət daşıyır.
Gəlin fərz edək ki, əgər 1994-cü ildə “Əsrin müqaviləsi” bağlanmasaydı nə olardı, əgər çətin, ağır şəraitdə Heydər Əliyevin səyləri nəticəsində biz Bakı-Tbilisi-Ceyhan neft kəmərinin tikintisinə başlamasaydıq nə olardı? Azərbaycan hansı problemlərlə üzləşərdi? İndi Azərbaycanın dünyadakı mövqeləri necə ola bilərdi? Əlbəttə, bunu təsəvvür etmək çətin deyildir. Bu gün Azərbaycanın inamlı inkişafının əsas səbəbi məhz 1990-cı illərin ortalarında ulu öndər Heydər Əliyev tərəfindən başlanmış neft strategiyasıdır. Bu neft strategiyası bizə böyük imkanlar yaratdı, böyük imkanlar da yaradacaqdır və biz bundan səmərəli istifadə edəcəyik.
Çox əlamətdar hadisədir ki, Azərbaycan neftinin Ceyhan terminalına daxil olması Respublika gününə təsadüf etdi. Bu hadisə də böyük rəmzi xarakter daşıyır. Çünki Azərbaycanın müstəqilliyinin möhkəmlənməsində Bakı-Tbilisi-Ceyhan neft kəmərinin rolu danılmazdır və çox əhəmiyyətlidir. Azərbaycan 15 ildir ki, müstəqil ölkə kimi yaşayır. Bu 15 il ərzində biz bütün dünyaya sübut etdik ki, müstəqil ölkə kimi yaşaya bilərik, biz öz siyasətimizi Azərbaycan xalqının milli maraqları üzərində qururuq, biz Azərbaycanı dünya birliyinə sürətlə inteqrasiya edirik. Azərbaycanın dünyadakı mövqeləri möhkəmlənir, ölkə daxilində olan sabitlik və vətəndaş həmrəyliyi möhkəmlənir və müstəqil ölkə kimi Azərbaycan bundan sonra da yaşayacaq və əbədi yaşayacaqdır.
Əziz dostlar, əziz bacılar və qardaşlar, bu tarixi hadisə münasibətilə sizi bir daha ürəkdən təbrik edirəm, hər birinizə cansağlığı, xoşbəxtlik arzulayıram.
Yaşasın müstəqil Azərbaycan!
Paris, 29 may 2006-cı il.
Bölmənin digər xəbərləri
