AZƏRBAYCAN PREZİDENTİ HEYDƏR ƏLİYEVİN ALMANİYA FEDERATİV RESPUBLİKASININ PREZİDENTİ ROMAN HERSOQ İLƏ GÖRÜŞÜ
Almaniya Prezidenti bu görüşdən çox məmnun olduğunu bildirərək, Azərbaycan Prezidenti ilə görüşünə mühüm əhəmiyyət verdiyini qeyd etdi. O, Azərbaycan parlamentinin sədri Rəsul Quliyevin üç gün öncə Almaniyaya səfərini xüsusi vurğulayaraq, onun çox səmərəli keçdiyini bildirdi.
Azərbaycan Prezidenti də AFR Prezidenti ilə görüşdən razı qaldığını, belə görüşlərin ölkələrimiz arasında möhkəm dostluq əlaqələri yaradılmasında mühüm rol oynadığını qeyd etdi.
Prezident Roman Hersoq keçmiş Sovet İttifaqı məkanında yeni yaranmış müstəqil dövlətlərlə Almaniya Federativ Respublikasının əlaqələrinin qurulmasına xüsusi əhəmiyyət verdiyini bildirdi. O qeyd etdi ki, AFR ilə Azərbaycan Respublikası arasında münasibətlər bu baxımdan xüsusi əhəmiyyət kəsb edir. AFR Prezidenti Azərbaycan ilə Almaniya arasında siyasi, iqtisadi və mədəni əlaqələr yaradılmasının və inkişaf etdirilməsinin hər iki ölkə xalqlarının mənafeyinə tam uyğun gəldiyini söylədi. Prezident Hersoq MDB ölkələrində yaşayan həmvətənlərinin vəziyyəti ilə də maraqlandığını bildirdi.
Azərbaycan Prezidenti Heydər Əliyev Prezident Roman Hersoqun fikirləri ilə tam şərik olduğunu bildirərək qeyd etdi ki, Azərbaycan ilə Almaniya arasında tarixi dostluq əlaqələri mövcud olmuşdur. O, hələ tələbə olarkən bir alman ilə eyni otaqda qaldığını xoş bir xatirə kimi söylədi.
H.Əliyev daha sonra dedi ki, Azərbaycan Respublikası üç il bundan öncə öz müstəqilliyini əldə etmişdir. O, gənc müstəqil Azərbaycan Respublikasında dövlət quruculuğu prosesi getdiyini, bütün dövlətlərlə qarşılıqlı surətdə faydalı siyasi, iqtisadi və mədəni əlaqələr yaradıldığını, iqtisadiyyatın azad bazar iqtisadiyyatı prinsipləri əsasında inkişaf etdirildiyini, ölkədə demokratiya, söz, vicdan, mətbuat azadlığının bərqərar olduğunu və insan hüquqlarının qurulduğunu bildirdi. Bununla bərabər Azərbaycan Prezidenti bu proseslərin müəyyən obyektiv və subyektiv səbəblərlə bağlı olaraq ağır keçdiyini qeyd edərək, Ermənistanın Azərbaycana təcavüzü nəticəsində altı ildən bəri davam edən müharibənin, habelə Çeçenistan hadisələri ilə əlaqədar respublikamızın məruz qaldığı iqtisadi blokadanın törətdiyi çətinliklər, bütün bunların iqtisadiyyatımıza vurduğu ağır zərbə, ərazimizin 20 faizdən çoxunun Ermənistan silahlı qüvvələri tərəfindən işğal olunduğu və işğal edilmiş torpaqlardan didərgin düşmüş bir milyondan çox qaçqının ağır və çətin şəraitdə çadırlarda yaşadığı barədə Almaniya Prezidentinə ətraflı məlumat verdi.
Prezident Heydər Əliyev Azərbaycanda almanların da yaşadığını qeyd edərək, Prezident Roman Hersoqu onların daha sıx yaşadığı əraziləri yenidən qurulmasında və inkişaf etdirilməsində iştirak etməyə dəvət etdi.
Görüşün sonunda Azərbaycan Prezidenti Heydər Əliyev ölkələrimiz arasında əlaqələrin inkişaf etdirilməsi üçün bu görüşün yaxşı zəmin olduğunu bir daha vurğulayaraq, Almaniya Prezidenti Roman Hersoqu Azərbaycana rəsmi səfərə dəvət etdi.
Bölmənin digər xəbərləri
