Son günlər ölkəmizdə bir neçə ictimai-siyasi tədbir keçirilmişdir. Əgər bir az əvvəlki günləri götürsək, Xalq Cümhuriyyətinin 85 illiyi ilə əlaqədar tədbirlər, indi Qurtuluş günü ilə əlaqədar tədbirlər və başqa tədbirlər keçirilmişdir. Mən müşahidə edirəm ki, ümumiyyətlə, son aylarda ölkəmizdə ictimai-siyasi tədbirlər mənalı keçir, insanların birləşməsinə, bir-birinə daha da yaxın olmasına kömək edir. Xüsusən, həm yaşlı nəslə, həm də gənc nəslə çox gözəl imkan verir ki, onların estetik səviyyəsi daha da yüksəlsin. 

Mən dünən televiziya ilə Milli parkda keçirilən tədbirə baxırdım. Əvvəldən axıradək baxdım. Çox gözəl idi, indiyə qədər belə şey olmamışdı. Yaxşı təşkil edilmişdi. Orada nə qədər adam olduğunu bilmirəm, hər halda, bizim Milli park insanlarla dolu idi. Məni maraqlandıran bir cəhət də əksəriyyətin gənclər olması idi. Saat 8-də başladı, fikirləşdim, yəqin ki, bir saatdan sonra camaat dağılışacaq, mən də televizorun qabağından durub gedərəm. Amma saat 8-dən 12-nin yarısınadək adamlar dağılışmadı, heç kəs getmədi. Konsertin axırıncı nömrələrinə elə qulaq asırdılar ki, elə bil, təzəcə başlamışdır.

Düzü, mən televizora çox baxmağı sevənlərdən deyiləm. Fikirləşirdim ki, bir hissəsinə baxaram, qalanını da mənə danışarlar. Amma mən ayrıla bilmədim, dedim ki, bir on dəqiqə də oturum, on dəqiqə də oturum..., ondan sonra da gördüm ki, atəşfəşanlıq oldu, amma bununla qurtarmadı.

Təbrik edirəm, bunu yaxşı keçirmisiniz. Təkcə musiqi, mahnı proqramı deyildi. Bizim xalqın, millətin indiki yaşayış səviyyəsini, həyat səviyyəsini və estetik səviyyəsini göstərirdi. Mən gördüm, adamlar var idi ki, uşaqları boyunlarına almışdılar. Fikirləşirdim ki, yorulacaqlar, amma bir saat, iki saat keçdi, heç yorulmadılar. Çox yaxşıdır. Təbii ki, bu da bizim Azərbaycanda mövcud olan ictimai-siyasi sabitliyin xalq üçün, millət üçün verdiyi gözəl töhfələrdir.

Mən sizi təbrik edirəm. Təşəkkür edirəm ki, izdihamlı, eyni zamanda çox məzmunlu, mənalı bir bayram keçirdiniz. Ondan əvvəl Yeni Azərbaycan Partiyası Opera və Balet Teatrında Milli qurtuluş gününün 10 illiyinə həsr olunmuş bayram keçirmişdir. Düzü, mənim yadımdan çıxıb ki, bunun 10 ili tamam olubdur. Vaxt çox tez gəlib keçibdir. Mən baxdım, məruzəçi Abutalıbovu da dinlədim, çox adam vardı, Ramiz Mehdiyev də, Murtuz müəllim də orada idi. Konsert proqramı oldu, çox yaxşı tədbir oldu.

Rayonlarda başqa tədbirlər keçirdilər. Bunlar, keçən illərdəkindən fərqlənir. Mən hesab edirəm ki, indiki ictimai-siyasi durum, əhval-ruhiyyə ən yüksək səviyyədədir. Təbii ki, bu da insanların həm həyat tərzi, həm yaşayışı ilə, həm də bütün başqa məsələlərlə əlaqədardır. Əgər insanlar rahat olmasalar, hansısa çatışmazlıqları olsa, şəhərin o başından Milli parka gəlməyəcəklər. Bu, bizim xalqımızın yüksək mədəni, siyasi səviyyəsini nümayiş etdirir.

Mən sizə bunları demək istəyirdim. Həm də istədim ki, sizi dinləyim. Yaxşı cəhətləri mən sizə dedim. Amma nöqsansız da deyil. Məsələn, dedilər atəşfəşanlıq olacaq. Mən balkona çıxdım ki, oradan daha yaxşı görüm. Atəşfəşanlıq yaxşı olmadı. Sizin bəzi raketlər zay idi, heç yuxarıya qalxmırdı. Mən gözləyirdim ki, atəşfəşanlıq o tərəfdən, bu tərəfdən bütün səmanı bürüyəcəkdir. Bu cəhətdən yaxşı işləyə bilməmisiniz. Əgər sizə zay raketlər veriblərsə, görün başqalarına nə veriblər. Sözün həqiqi mənasında atəşfəşanlıq olmadı. Mən də balkonda durub, gözləyirdim ki, hələ bundan sonra olacaqdır. Amma bununla da qurtardı. Mən bir çatızmazlığı dedim. Qalanlarını da özünüz bilirsiniz.

X X X

Prezidentin İcra Aparatının rəhbəri RAMİZ MEHDİYEV müşavirədə çıxış edərək bildirdi ki, həqiqətən, Azərbaycan Xalq Cümhuriyyətinin 85 illiyi ilə əlaqədar ölkəmizdə geniş tədbirlər - elmi konfranslar, yığıncaqlar, təntənəli iclaslar keçirilmişdir. Bütün bunlar barədə televiziya və mətbuat vasitəsilə məlumat verilmişdir. Təxminən bir həftədir ki, respublikanın hər yerində Milli qurtuluş günü ilə əlaqədar ən müxtəlif tədbirlər keçirilir. İyunun 15-də isə Bakı şəhərində bu münasibətlə möhtəşəm bayram şənlikləri təşkil olunmuşdur.

İcra Aparatının rəhbəri dedi ki, builki tədbirlər ötən illərdəkindən tamamilə fərqlənir. İnsanların bu şənliklərdə yaxından iştirak etməsi həm də onların yaşayış tərzindəki, əhval-ruhiyyəsindəki dəyişiklikdən xəbər verir. Builki bayram tədbirləri əvvəlkilərdən məzmun baxımından da fərqlənir. Şənliklərə toplaşan insanlar çıxış edərək, Prezidentimizin siyasəti, ölkə həyatının müxtəlif sahələrində gedən müsbət proseslər haqqında fikirlərini söyləyirdilər. Bu tədbirlər xalqımızın öz Prezidentinə dərin hörmət və ehtiramını bir daha nümayiş etdirdi.

R.Mehdiyev xüsusi vurğuladı ki, həqiqətən də, Azərbaycanda ictimai-siyasi vəziyyət çox yaxşıdır və xalq öz Prezidentini sevir, qarşıdakı seçkilərdə də ona səs verəcəkdir. Biz bu yöndə tədbirləri davam etdirməli, işimizi daha da təkmilləşdirməli və qarşımıza qoyduğumuz vəzifələrin yerinə yetirilməsinə nail olmalıyıq.

Müşavirədə Qurtuluş günü münasibətilə iyunun 15-də Milli parkda Bakı Şəhər İcra Hakimiyyəti və Azərbaycan televiziyasının yüksək səviyyədə təşkil etdikləri bayram şənliyindən razılıqla bəhs olundu.

Şəhər İcra Hakimiyyətinin başçısı HACIBALA ABUTALIBOV da bildirdi ki, paytaxtda həm Respublika gününə, həm də Milli qurtuluş gününə həsr edilmiş tədbirlər yüksək səviyyədə keçmişdir. Bunları yüksək qiymətləndirdiyinə görə, Prezident Heydər Əliyevə minnətdarlıq edən icra hakimiyyətinin başçısı söz verdi ki, bu işdə olan çatışmazlıqlar gələcəkdə aradan qaldırılacaqdır.

H.Abutalıbov məlumat verdi ki, hazırda paytaxtın bütün küçələrində əsaslı və cari təmir işləri gedir. Bu günlərdə isə hava limanından Mərdəkan yoluna qədər olan magistralın əsaslı təmirinə başlanacaqdır. Hazırda yolun həmin hissəsi çox pis vəziyyətdədir. O, dövlətimizin başçısını əmin etdi ki, Bakının bütün parkları və bağları yüksək səviyyədədir. Çalışacağıq sentyabrın 1-dək şəhərimizin bütün rayonlarında hər bir həyət, məhəllə yüksək səviyyədə istirahət guşəsi olsun. Bütün bunlar Prezidentimizin ölkədə yaratdığı ictimai-siyasi sabitliyin nəticəsidir. İyunun 15-də Milli parkda keçirilən bayram şənliyinə insanların çoxu ailə üzvləri ilə birlikdə gəlmişdi. Biz özümüz bütün günü orada olmuşuq, hamı Prezidentimizə minnətdarlıq edir, uzun ömür, möhkəm cansağlığı arzulayırdı. Bu, bir daha sübut edir ki, insanlar qarşıdakı seçkilərdə yenə də öz prezidentlərinə səs verəcəklər. Bir milyondan çox əhalinin bayram şənliklərində həvəslə iştirak etməsi dövlətimizin başçısına ümumxalq məhəbbətinin əyani təzahürü idi.

İcra hakimiyyətinin başçısı dedi ki, parka gələnlərin sayı 1 milyon 300 min nəfərdən çox idi. Biz hətta Azərneft meydanından Azadlıq meydanınadək ərazidə prospektdəki minik maşınlarının götürülməsi barədə göstəriş verməyə məcbur olmuşduq. Gecə saat birin yarısında park hələ də boşalmamışdı.

Yeni Azərbaycan Partiyasının icraçı katibi, Milli Məclisin deputatı ƏLİ ƏHMƏDOV əvvəlki çıxışlarda deyilənlərlə razılaşaraq bildirdi ki, bu bayram tədbirlərinin belə əzəmətli olmasının bir neçə səbəbi var. Bu, ilk növbədə ölkədəki əmin-amanlıqla, insanların ailə qayğılarının olmaması və ümumi əhval-ruhiyyənin yüksəlməsi ilə bağlıdır. Lakin eyni zamanda, bu bayram tədbirləri insanları xəyalən 10 il bundan əvvəlki günlərə aparır. O dövrə ki, adamlar axşam qaranlıq düşəndə həyətə, küçəyə çıxa bilmirdilər, övladlarının təhlükəsizliyi sarıdan narahatlıq keçirirdilər. İnsanlar həmin günləri unutmamışlar. Respublika gününün və ondan az sonra Milli qurtuluş gününün qeyd edilməsi Azərbaycanın müstəqilliyinin əbədi və dönməz olmasının daha bir sübutuna çevrildi və insanlar buna ürəkdən inanırlar. İnsanlarımız bilirlər ki, Milli qurtuluş günü Heydər Əliyevin yenidən siyasi hakimiyyətə qayıdışının bayramıdır. Ona görə də bu, həmin təntənələrdə iştirak edən insanların ötən on ildə ölkəmizin həyatındakı bütün müsbət dəyişikliklərin əsl səbəbkarı olan Prezident Heydər Əliyevi qarşıdakı seçkilərdə də birmənalı şəkildə dəstəkləyəcəyini sübut edir. İnsanların əhval-ruhiyyəsi kifayət qədər yüksəkdir və onlar sabaha inamla baxılar. Dərk edirlər ki, bugünkü dinc həyatı, əmin-amanlığı Heydər Əliyev təmin edib və onun gələcəkdə davam etdirilməsi də Heydər Əliyevin adı ilə bağlı olacaqdır. Bu, həmin tədbirlərdən bizim çıxardığımız əsas nəticədir.

Prezident HEYDƏR ƏLİYEV müşavirə iştirakçılarına tapşırdı ki, bu tədbirlərin hamısını bir daha gözdən keçirsinlər, yaxşı cəhətlərdən gələcəkdə də istifadə etsinlər, çatışmazlıqları aradan qaldırsınlar ki, xalqın əhval-ruhiyyəsi daha da yüksək olsun.

Prezidentin İcra Aparatının rəhbəri RAMİZ MEHDİYEV məlumat verdi ki, Müstəqil Araşdırmalar Mərkəzi may ayında sorğu aparmışdır. Bu sorğunun nəticələri ABŞ-ın Respublikaçılar İnstitutunun əvvəllər keçirdiyi sorğunun nəticələrini tamamilə təsdiqləyir, hətta bəzi göstəricilərdə onu üstələyir. Ona görə də indi burada səslənənən fikirlərin real əsası vardır. Ölkədəki vəziyyət bunu bir daha təsdiq edir.

Prezidentin İcra Aparatının ictimai-siyasi şöbəsinin müdiri ƏLİ HƏSƏNOV çıxışında bildirdi ki, bayram günlərində Türkiyədən gəlmiş bir qrup junalist də respublikamızda idi. Onlar həm Bakının ayrı-ayrı rayonlarında keçirilən tədbirləri, həm də Milli parkdakı bayram şənliyini öz gözləri ilə görmüşlər. Onlar deyirdilər ki, dünyanın heç bir ölkəsində xalq ilə ölkənin rəhbəri arasında belə yaxınlıq yoxdur, seçkilərə hələ bir neçə ay qalmış xalq bu tədbirlərdə fəal iştirak etməklə öz münasibətini açıq ifadə edir. Türkiyədən, eləcə də Rusiyadan gəlmiş jurnalistlər Azərbaycandakı ictimai-siyasi vəziyyət və xalqımızın əhval-ruhiyyəsi barədə təəssüratı bilavasitə özləri hər şeyi görüb aldılar.

X X X

Müşavirədə Prezidentin İşlər idarəsinin müdiri Akif Muradverdiyev, Prezidentin Katibliyinin rəisi Dilarə Seyidzadə və Prezidentin İcra Aparatının Humanitar siyasət şöbəsinin müdiri Fatma Abdullazadə iştirak edirdilər.

AZƏRTAC

Foto Yaşar Xəlilovundur