AZƏRBAYCAN PREZİDENTİ İLHAM ƏLİYEV DÖVLƏTLƏRARASI AVİASİYA KOMİTƏSİNİN SƏDRİ TATYANA ANODİNANI QƏBUL ETMİŞDİR
Azərbaycan Respublikasının Prezidenti İlham Əliyev iyunun 2-də Prezident sarayında Dövlətlərarası Aviasiya Komitəsinin sədri Tatyana Anodinanı qəbul etmişdir.
TATYANA ANODİNA dövlətimizin başçısına müraciət edərək dedi:
- Hörmətli cənab Prezident!
Mənə çox yüksək şərəf - xoş bir vəzifəni yerinə yetirmək və yüksək beynəlxalq mükafatı, aviasiyanın inkişafına xüsusi töhfəyə görə Qızıl medalı və Fəxri diplomu Sizə təqdim etmək nəsib olmuşdur. Xüsusi Beynəlxalq Şuranın qərarı ilə bu mükafatla görkəmli alimlər, ictimai xadimlər, dünya şöhrətli şəxslər təltif edilir. Siz mülki aviasiyanın dinamik, davamlı inkişafının təmin edilməsinə müstəsna şəxsi töhfənizə görə təltif olunmusunuz. Bu töhfəyə görə şəxsən Sizə, Azərbaycan hökumətinə ürəkdən minnətdaram və təşəkkür edirəm. Zənnimcə, hamıya, ilk növbədə, xalqa, hər bir dövlət xadiminə tamamilə məlum və aydındır ki, aviasiya iqtisadiyyatın inkişafının da, bütövlükdə, ölkənin və beynəlxalq əlaqələrin inkişafının da başlıca əsaslarından biri olmuşdur, əsasıdır və olacaqdır. Aviasiya həmişə sülh işinə və xalqların yaxınlaşmasına xidmət etmişdir.
Bu gün Heydər Əliyeviçi, aviasiyanı həmişə sevmiş, həmişə ona xüsusi hörmətlə, çox böyük tələbkarlıqla yanaşmış insanı xatırlamaq istərdik. Biz onun sözlərini yadda saxlayırıq. O, harada, hansı vəzifədə olmasından asılı olmayaraq deyirdi: “Aviasiya, hər şeydən əvvəl, təhlükəsizlik deməkdir”. Siz Heydər Əliyeviçin - çox müdrik siyasətçinin, öz xalqına hədsiz dərəcədə sədaqətli olmuş, fəaliyyəti təkcə öz ölkəsinin iqtisadiyyatının inkişafına deyil, həm də beynəlxalq əməkdaşlığın çoxşaxəliliyinə yönəldilmiş insanın xəttini davam etdirirsiniz. O bildirdi ki, hər bir dövlət dünyanın digər ölkələri ilə sülh və həmrəylik şəraitində inkişaf etməlidir. Düşünürəm ki, bu mükafat Sizin xidmətlərinizi göstərən kiçik bir əlamətdir. Rəmzi haldır ki, biz bu mükafatı Sizə məhz aviasiya bayramı günündə təqdim edirik.
Bu gün biz aviatorlar üçün və bütün Azərbaycan xalqı üçün əziz olan və həmişə xatirəmizdə yaşayacaq insanın - Heydər Əliyeviçin məzarı önünə əklil qoyduq. Demək istərdim ki, aviatorlar öz bayramını böyük ruh yüksəkliyi ilə qeyd edirlər. Bu gün Sizin Sərəncamınız dərc olunmuşdur. Ona görə də icazə verin, aviatorların adından Sizə minnətdarlığımızı, təşəkkürümüzü bildirim, çox mürəkkəb, vacib siyasi, dövləti işinizdə uğurlar, bizim sevdiyimiz Azərbaycana və Azərbaycan xalqına isə tərəqqi arzulayım.
Prezident İLHAM ƏLİYEV yüksək mükafata görə minnətdarlıq edərək dedi:
- Əməyimə verilən belə qiymətə görə çox təşəkkür edirəm. Bu mükafatı qəbul etmək mənə çox xoşdur. Həqiqətən, Azərbaycanda aviasiyanın inkişafı üçün bütün istiqamətlərdə - maddi-texniki baza məsələsində də, yeni hava limanlarının tikintisində və yeni təyyarələr alınmasında da çox işlər görülmüşdür. Ümumən, ölkəmizdə nəqliyyat infrastrukturu çox dinamik inkişaf edir.
Ancaq aviatorların bayramı yox idi. Belə təşəbbüs irəli sürüldü. Biz Azərbaycan aviasiyasının əsası qoyulduğu tarixi günü müəyyən etdik - 2 iyun. Cari ildən başlayaraq, bu günü hər il qeyd edəcəyik. İndi aviatorların da öz peşə bayramı var. Dünən mən onlardan bəzilərini dövlət mükafatları ilə təltif etdim. Əlbəttə ki, iqtisadiyyatın gələcək inkişafı bu sektorun inkişafı ilə bilavasitə bağlıdır. İndi biz regionların inkişafı üçün çox fəal siyasət aparırıq. Regionlara normal gediş-gəliş, o cümlədən hava yolu olmadan bu siyasəti həyata keçirmək çətin olacaqdır. Ölkəmiz ərazicə böyük olmasa da, sovet dövründə çoxlu hava limanı vardı, lakin sonra onlar fəaliyyətini dayandırdı. Əslində, cəmi üç hava limanı - Bakı, Gəncə və Naxçıvan aeroportları qaldı. Onların ikisi, hətta hər üçü yenidən tikildi - aerovağzal binaları da, uçuş-enmə zolaqları da. Biz infrastrukturun bərpasında daha uzağa getdik, onu modernləşdirdik. Hazırda tikilən hava limanları artıq dünya standartları səviyyəsində olacaqdır. Sizinlə əməkdaşlıq bizim üçün də çox vacibdir. Bilirəm ki, biz sizin təşkilatınızla çox səmərəli əməkdaşlıq edirik, siz bizə çox kömək edirsiniz. Buna görə sağ olun.
Bölmənin digər xəbərləri
