AZƏRBAYCAN PREZİDENTİ İLHAM ƏLİYEVİN NİTQİ
Əziz qonaqlar,
Bu gün ölkələrimiz arasında iqtisadi münasibətlərin inkişafı baxımından çox əlamətdar bir gündür. Mən çox şadam ki, Litva Prezidentinin Azərbaycana rəsmi səfəri çərçivəsində işgüzar dairələrimiz bir-biri ilə görüşmək, fikir mübadiləsi aparmaq, hər bir ölkənin imkanlarını qiymətləndirmək və uzunmüddətli iqtisadi əlaqələr qurmaq fürsəti əldə etmişlər.
Təbii ki, yaşadığımız ümumi siyasi sistemdə, sovet vaxtında da müəyyən iqtisadi münasibətlər mövcud olmuşdur. Lakin SSRİ-nin süqutundan sonra, əfsuslar olsun ki, iqtisadi əlaqələrin böyük hissəsi itirilmişdir. Ölkələrimiz keçid dövrünü yaşamışdır. Əlbəttə ki, bir çox iqtisadi və daxili problemlər iqtisadi imkanların qiymətləndirilməsinə imkan verməmişdir.
Bu gün isə Avropa İttifaqının üzvü və çox güclü iqtisadi potensiala və artıma malik olan Litva bir tərəfdən, iqtisadi böhrandan uğurla çıxmış və sürətlə iqtisadi inkişaf edən Azərbaycan digər tərəfdən iqtisadi nailyyətlərimizin daha da artırılması üçün çox gözəl imkan yaradır. Əminəm ki, qarşılıqlı surətdə faydalı iqtisadi əməkdaşlıq olduqca səmərəli ola bilər. Təbii ki, hökumətlərin oynadığı rol çox əhəmiyyətlidir, lakin eyni zamanda, sizin tərəfinizdən də birgə fəaliyyətin başlanması üçün çox güclü iqtisadi təkanlar olmalıdır.
Azərbaycan öz infrastrukturunu, potensialını, resurslarını və xidmətlərini təklif edə bilər. Təbii ki, Litva da bu işləri görə bilər. Litva Avropa İttifaqının üzvüdür. Azərbaycan tamamilə Avropa standartlarına uyğun olaraq, öz siyasi və iqtisadi sistemini dünya sisteminə qovuşdurmaqdadır. Gələcək illər ərzində Azərbaycanda iqtisadi artım daha sürətli olacaqdır. Həmin artım elə bu gün müşahidə edilir. Yəni burada söhbət təkcə çox gözəl makroiqtisadi göstəricilərdən getmir. Eyni zamanda, bu iqtisadi inkişaf artıq insanların gündəlik həyatında hiss olunur. Misal üçün, inşaat biznesi, enerji inkişafı sahələrinin adı çəkilə bilər. Bütün bunlar bir-birilə bağlıdır.
Azərbaycanın Avropa ilə Asiya arasında təbii körpü rolunu oynaması, mühüm coğrafi-strateji mövqeyi və yaradılan bütün lazımi infrastruktur da çox faydalı ola bilər. Bizim gələcək üçün planlarımız böyükdür. Bir çox layihələrimiz var ki, orada böyük beynəlxalq əməkdaşlıq tələb olunur. Adambaşına düşən birbaşa xarici sərmayələrin həcminə görə Azərbaycan keçmiş sovet respublikaları arasında birinci yeri tutur. Bu, eyni zamanda, ölkədə çox yaxşı biznes mühitinin yaradılmasından xəbər verir. Ona görə də Litvadan olan potensial sərmayədarlar özlərini burada təhlükəsiz və rahat hiss edə bilərlər. Bildiyiniz kimi, bu amil digər ölkədə uğurlu iqtisadi əməkdaşlığın və sərmayə qoyuluşunun əsas şərtlərindəndir.
Hazırda biz iqtisadiyyatımızı şaxələndirməyə çalışırıq. Təbii ki, enerji sektoru bir çox illər ərzində iqtisadiyyatımızın əsasını təşkil edəcəkdir. Yəni bizim görəcəyimiz işlərdən asılı olmayaraq, iqtisadiyyatın heç bir digər sahəsi həmin sektorla müqayisə edilə bilməz. Çünki gələn iki-üç il ərzində ölkəmizdə neft və qaz hasilatının həcmi artacaqdır. Bu səbəbə görə, hazırda bizim əsas diqqətimiz qeyri-neft sektorunun inkişafına yönəlibdir. Yəni kənd təsərrüfatı, xidmətlər sahəsi nəzərdə tutulur və sizin həmin sahələrdə çox yaxşı təcrübəniz var.
Bu gün, görüşə gəlməzdən əvvəl, biz rəsmilərlə fikir mübadiləsi apardıqdan sonra belə bir nəticəyə gəldik ki, artıq çox münasib imkanlar mövcuddur və biznes aparılır. Ümumiyyətlə, iş adamı onun üçün faydalı olan biznes sahəsini rəsmilərdən daha yaxşı müəyyən edir.
Birgə işləmək üçün yaxşı iradəmiz var. Ölkələrimiz dostdur, biz bir-birimizə çox güclü siyasi dəstək veririk. Prezident Valdas Adamkusun Azərbaycana indiki səfəri ölkələrimiz arasında təşəkkül tapmış möhkəm siyasi münasibətlərin bariz nümunəsidir. Bizim potensialımız var. İki tərəf arasında istifadə olunacaq və qarşılıqlı fayda gətirəcək imkanlar var. Bu gün burada hər iki ölkənin çoxsaylı iş adamları əyləşib və onlar potensial əməkdaşlıq imkanlarını müzakirə edəcəklər. Hesab edirəm ki, siz diqqətinizi əsasən praktik məsələlərə yönəltsəniz, çox faydalı olar. Siz qanun normaları, hüquqi sistem, vergi sistemi, sərmayə imkanları, layihələr ilə tanış ola bilərsiniz. Bu yaxınlarda biz dövlətə məxsus olan sərmayə şirkəti yaratmışıq. Onun ilkin kapitalı 100 milyon ABŞ dollarıdır. Bu, yalnız cari il üçün nəzərdə tutulub və gələn il, bu rəqəm ola bilsin ki, artırılacaqdır. Bu şirkətin məqsədi Azərbaycanda müxtəlif sənaye layihələrinin həyata keçirilməsində həmsərmayəçi olmaqdır. Bu, xarici sərmayədarları ölkəyə cəlb edə bilər.
Biz hökumət tərəfindən təcili qaydada inkişaf etdirilməli və prioritet xarakterli əsas sahələri müəyyən etməliyik. Eyni zamanda, hesab edirəm ki, dövlət sərmayə şirkətinin Azərbaycanda həmin layihələrdəki iştirakı potensial sərmayədarların etimadını artıracaqdır. Yəni əgər onlar dövlət şirkəti ilə hansısa layihədə iştirak etsələr, onun uğuruna tam əmin olacaqlar.
Bütün imkanlar göz qabağındadır. Hesab edirəm ki, əgər işgüzar dairələr həyata keçirilməsini planlaşdırdığımız praktik layihələrə və sizin düşündüyünüz layihələrə diqqət yetirsələr, onda bunun nəticələri olacaqdır.
Mən sizin hamınızı bir daha salamlamaq istəyirəm. Bugünkü tədbiri ikitərəfli münasibətlər üçün çox mühüm hesab edirəm və forum gələcəkdə əlaqələrimizin inkişafında əsas rol oynaya bilər. Mən fəaliyyətinizdə sizə uğurlar arzulayıram.
Çox sağ olun.
Bölmənin digər xəbərləri
