AZƏRBAYCAN RESPUBLİKASI DÖVLƏT NEFT FONDUNUN MƏLUMATI
Azərbaycan Respublikası Dövlət Neft Fondundan AZƏRTAC-a bildirmişlər ki, 2002-ci ildə Neft Fondunun gəlirləri 1 trilyon 474 milyard manat, xərcləri isə 434 milyard manat təşkil etmişdir.
Ötən il Dövlət Neft Fondunun neft sazişlərinin həyata keçirilməsi ilə bağlı gəlirləri 1 trilyon 93 milyard manat, o cümlədən mənfəət neftinin satışından gəlirləri isə 976 milyard manat olmuşdur. Azərbaycan Prezidentinin 30 iyul 2002-ci il tarixli 739 nömrəli Fərmanına uyğun olaraq, 2002-ci ildə respublikamızın Milli Bankında saxlanılan 257 milyard manat bonus vəsaitləri Bakı-Tbilisi-Ceyhan əsas ixrac boru kəməri layihəsində Azərbaycan Respublikası Dövlət Neft Şirkətinin iştirak payının maliyyələşdirilməsi çərçivəsində İqtisadi İnkişaf Nazirliyinin ARDNŞ-in AzBTC Co. Törəmə şirkətində olan səhmlərinin ödənilməsi məqsədi ilə Dövlət Neft Fonduna köçürülmüşdür. 2002-ci ildə neft fondunun vəsaitinin idarə olunmasından 124 milyard manat, o cümlədən valyuta vəsaitlərinin yenidən qiymətləndirilməsindən 63 milyard manat gəlir əldə edilmişdir.
Azərbaycan Prezidentinin 22 avqust 2001-ci il tarixli 562 nömrəli, 7 sentyabr 2001-ci il tarixli 577 nömrəli və 13 may 2002-ci il tarixli 700 nömrəli fərmanlarının və Neft Fondunun 2002-ci il büdcəsinin icrasını təmin etmək məqsədilə Ermənistan Respublikasının etnik təmizləmə və təcavüz siyasəti nəticəsində öz doğma yurdlarından didərgin düşmüş qaçqın və məcburi köçkün ailələrinin məskunlaşdırılması və sosial-məişət vəziyyətinin yaxşılaşdırılması üzrə tədbirlərin maliyyəşdirilməsi çərçivəsində 2002-ci ildə Dövlət Neft Fondundan Qaçqınların və Məcburi Köçkünlərin İşləri üzrə Dövlət Komitəsinin sifarişləri əsasında 189 milyard manat vəsait istifadə edilmişdir. Ötən il Bakı-Tbilisi-Ceyhan əsas ixrac boru kəməri layihəsində Azərbaycan Respublikası Dövlət Neft Şirkətinin iştirak payının maliyyələşdirilməsi üçün ödənilmiş vəsait 242 milyard manat təşkil etmişdir. 2002-ci ildə Neft Fondunun idarə edilməsi ilə bağlı xərclər 3 milyard manat olmuşdur.
2002-ci ilin əvvəlinə 2 trilyon 347 milyard manat (təqribən 491 milyon ABŞ dolları) təşkil etmiş Neft Fondunun vəsaiti 2003-cü il yanvarın 1-nə 3 trilyon 387 milyard manata (təqribən 692 milyon ABŞ dolları) bərabər olmuşdur.
Bölmənin digər xəbərləri
