AZƏRBAYCAN RESPUBLİKASI MƏRKƏZİ SECKİ KOMİSSİYASININ BƏYANATI
Kütləvi informasiya vasitələrinin verdikləri xəbərlərə görə, Azərbaycanın Ermənistan silahlı qüvvələri tərəfindən işğal edilmiş Qarabağ bölgəsinin yuxarı hissəsində - qondarma “Dağlıq Qarabağ Respublikası”nda bu il sentyabrın 5-də “yerli hakimiyyət orqanlarına seçkilər” adlandırılan tədbirlərin keçirilməsi planlaşdırılmışdır.
Azərbaycan Respublikasına qarşı törədilən təcavüz nəticəsində ələ keçirilərək, minlərlə azərbaycanlı əhalisi doğma yurdlarından zor gücünə qovulub didərgin salınan ərazidə elan olunmuş və dünyanın heç bir dövləti tərəfindən tanınmamış “DQR”-də nəzərdə tutulan həmin tədbir Azərbaycan Respublikasının Konstitusiyasına və beynəlxalq hüquq normalarına tamamilə ziddir, Dağlıq Qarabağ münaqişəsinin danışıqlar yolu ilə nizama salınmasına dair ATƏT-in səylərinə qəsdən törədilən növbəti əngəl olmaqla, oyuncaq rejimə qanuni don geyindirmək cəhdindən başqa bir şey deyildir.
Uydurma “DQR” liderlərinin bu addımı Avropa Şurasının bir sıra nüfuzlu qurumlarının rəhbərləri, həmçinin Türkiyənin Xarici İşlər Nazirliyi tərəfindən haqlı olaraq pislənilmişdir. Bu cür qanunsuz hərəkətə Azərbaycan Respublikası Milli Məclisinin sədri cənab M.N.Ələsgərovun və Xarici İşlər Nazirliyinin bəyanatlarında tutarlı, kəskin qiymət verilmişdir.
Azərbaycan Respublikasının Mərkəzi Seçki Komissiyası bildirir ki, qondarma “DQR”-də keçirilməsi nəzərdə tutulan “yerli hakimiyyət orqanlarına seçkilər” deyilən tədbir qanunsuzdur və nəticələri legitim hesab edilə bilməz.
Bölmənin digər xəbərləri
