Dilarə Əliyeva: Opera sənətinə böyük hörmətlə yanaşmaq borcumuzdur
Bakı, 9 sentyabr, AZƏRTAC
Opera musiqi sənətinin əsas janrlarından biridir. Ölkəmizdə bu janrın banisi Üzeyir Hacıbəylidir. Bu sənət bizə miras qalıb və bizim borcumuz opera sənətinə böyük hörmətlə yanaşmaq, onu dəyərləndirmək və ona böyük əhəmiyyət verməkdir.
Bunu Azərbaycanın Əməkdar artisti, aktrisa və teleaparıcı Dilarə Əliyeva Xalq artisti Fidan Hacıyevanın III Beynəlxalq Opera Festivalının açılışı zamanı AZƏRTAC-ın müxbiri ilə söhbətində deyib.
“Opera universal bəşər dilidir. Bu, dünya miqyaslı sənətdir və dünyamıza xüsusi gözəllik və yeni çalarlar bəxş edir. Məhz bu sənətin sayəsində biz dünyaya açılır, dünya səhnəsinə çıxa bilirik. Fidan Hacıyeva bu sənətin ən parlaq nümayəndələrindən biridir. O, özündə çoxlu duyğu və peşəkarlıq cəmləşdirib, bu gözəlliyi bizə bəxş etməyi bacarır”, - deyə müsahibimiz vurğulayıb.
Xalq artisti, maestro Yalçın Adıgözəlovun rəhbərliyi, Xalq artisti Fidan Hacıyevanın iştirakı və Niyazi adına Dövlət Simfonik Orkestrinin müşayiəti ilə keçiriləcək Opera Festivalı sentyabrın 7-dən dekabrın 7-dək davam edəcək. Festival ölkənin müxtəlif regionlarını əhatə edəcək. Tədbir çərçivəsində təqdim olunacaq konsert proqramları Azərbaycanın hüdudlarından kənarda da nümayiş etdiriləcək.
Festivalın əsas xüsusiyyəti isə gənc istedadlara dəstək məqsədi daşıyan “Gənclərin səsi - gənclərə dəstək” adlı xüsusi konsert layihəsi olacaq.
Bölmənin digər xəbərləri
