AZƏRBAYCAN RESPUBLİKASI XARİCİ İŞLƏR NAZİRLİYİNİN MƏTBUAT XİDMƏTİNİN BƏYANATI
Məlum olduğu kimi, cari ilin 31 avqust-7 sentyabr tarixlərində Cənubi Afrikanın Durban şəhərində irqçiliyə, irqi ayrı-seçkiliyə, ksenofobiyaya və oxşar dözülməzliyə qarşı Ümumdünya Konfransı keçirilmişdir.
Azərbaycanın bəzi kütləvi informasiya vasitələrində, xüsusilə də müxalifət mətbuatında bu konfransın işində guya Ermənistanın xarici işlər naziri Vartan Oskanyanın iştirak etməsi ilə əlaqədar yalan məlumatlar yayılmış, erməni nazirinin əslində mövcud olmayan çıxışlarından sitat gətirilmişdir. Bu fonda Azərbaycan tərəfinin guya konfransda zəif təmsil olunması barəsində də həqiqətə uyğun gəlməyən iradlar səsləndirilmişdir.
Azərbaycan Respublikasının Konfransda iştirak etmiş nümayəndə heyəti tərəfindən verilmiş məlumata əsasən aydın olmuşdur ki, Ermənistanın xarici işlər naziri Ümumdünya Konfransında iştirak etməmişdir. Konfransda Ermənistanı bu ölkənin Cenevrədəki Daimi nümayəndəsi, Daimi nümayəndəliyin əməkdaşı və Xarici İşlər Nazirliyinin idarə rəisi təmsil etmişlər.
İştirakçılar siyahısında, Konfransın mətbuat üçün məlumatında və rəsmi sənədlərində V.Oskanyanın adının göstərilməsini nəzərə alan Azərbaycan nümayəndə heyəti Əsas Komitənin iclasında Ermənistanın xarici işlər nazirinin Konfransda iştirak etməməsini vurğulayaraq, Konfransın sənədində müvafiq düzəlişlərin aparılmasını tələb etmişdir. Azərbaycan nümayəndə heyətinin həmin tələbi Konfransın protokolunda öz əksini tapmışdır.
Bölmənin digər xəbərləri
