AZƏRBAYCAN RESPUBLİKASININ NAZİRLƏR KABİNETİNDƏ
“Texniki təhlükəsizlik haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2000-ci il 2 fevral tarixli Fərmanının 2-ci bəndinin icrası ilə əlaqədar Azərbaycan Respublikası Nazirlər Kabinetinin 2002-ci il 8 iyul tarixli 102 nömrəli qərarına əsasən, “Təhlükə potensiallı obyektlərdə istifadə olunan texniki qurğulara və avadanlıqlara sertifikatın verilmə Qaydaları” təsdiq edilmişdir.
Bu qərar imzalandığı gündən qüvvəyə minir.
X X X
“Azərbaycan Respublikasının bəzi qanunvericilik aktlarına dəyişikliklər və əlavələr edilməsi haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2001-ci il 26 dekabr tarixli Fərmanının icrasını təmin etmək məqsədi ilə Azərbaycan Respublikası Nazirlər Kabinetinin 2002-ci il 8 iyul tarixli 103 nömrəli qərarına əsasən, “İkinci dünya müharibəsi iştirakçılarının protez-ortopediya məmulatları, əlillərin, fövqəladə hallarda insanların xilas edilməsində və tibbi yardım göstərilməsində iştirak edərək ziyan çəkmiş vətəndaşların protez-ortopediya məmulatları, əlil, kreslo-veloarabaları, texniki və başqa reabilitasiya vasitələri ilə təmin edilməsi Qaydaları” təsdiq edilmişdir.
Bu qərar imzalandığı gündən qüvvəyə minir.
X X X
Bruselyoza və vərəmə yoluxmuş heyvanların məcburi kəsilərək zərərsizləşdirilməsi nəticəsində heyvan sahibinə dəyən zərərin kompensasiyasının ödənilməsi barədə Azərbaycan Respublikası Kənd Təsərrüfatı Nazirliyinin İqtisadi İnkişaf Nazirliyi və Maliyyə Nazirliyi ilə razılaşdırılmış təklifini nəzərə alaraq Azərbaycan Respublikasının Nazirlər Kabinetinin 2002-ci il 8 iyul tarixli 104 nömrəli qərarına əsasən, “Bruselyoza və vərəmə yoluxmuş heyvanların məcburi kəsilərək zərərsizləşdirilməsi nəticəsində heyvan sahibinə dəyən zərərin kompensasiyasının ödənilməsi Qaydaları” təsdiq edilmişdir.
Azərbaycan Respublikasının Maliyyə Nazirliyinə tapşırılmışdır ki, bruselyoza və vərəmə yoluxmuş heyvanların məcburi kəsilərək zərərsizləşdirilməsi nəticəsində heyvan sahibinə dəyən zərərin kompensasiyasının ödənilməsi üçün təhvil verilən ətin orta topdansatış bazar qiyməti ilə faktiki satış qiyməti arasındakı fərqin müəyyən olunmuş hissəsini ödəmək məqsədi ilə Azərbaycan Respublikasının Kənd Təsərrüfatı Nazirliyi tərəfindən təqdim edilmiş hesablamalara əsasən dövlət büdcəsində “əhaliyə sair ödənişlər” yarımmaddəsində müvafiq vəsait nəzərdə tutulmuşdur.
Bu qərar imzalandığı gündən qüvvəyə minir.
Bu barədə AZƏRTAC-a Nazirlər Kabinetinin mətbuat mərkəzindən məlumat verilmişdir.
Bölmənin digər xəbərləri
