AZƏRBAYCAN RESPUBLİKASININ PREZİDENTİ HEYDƏR ƏLİYEV BÖYÜK BRİTANİYANIN TİCARƏT NAZİRİ İLƏ GÖRÜŞMÜŞDÜR
Dövlətimizin başçısını böyük səmimiyyətlə qarşılayan cənab Hezltayn Azərbaycan Prezidenti ilə keçirdiyi əvvəlki görüşü çox məmnunluqla xatırladığını söylədi və dedi ki, bu, onun həyatında ən maraqlı görüşlərdən biri olmuşdur.
Prezident Heydər Əliyev də bu görüşdən məmnun olduğunu bildirdi və qeyd etdi ki, cənab Hezltaynı özünün şəxsi dostu hesab edir. Azərbaycan rəhbəri Böyük Britaniyanın Baş naziri Con Meycor, xarici işlər və millətlər birliyi işləri üzrə dövlət katibi Daqlas Hörd ilə görüşlərindən bəhs edərək razılıq hissi ilə dedi ki, ölkəmizlə İngiltərə arasında geniş əlaqələr formalaşmaqdadır.
İqtisadi əlaqələrimizin daha da inkişaf etdirilməsi məsələlərinə xüsusi diqqət yetirən cənab Hezltayn təkcə neft şirkətlərinin deyil, ayrı-ayrı iş adamlarının da sıx əlaqələr qurmasına böyük ehtiyac olduğunu vurğuladı. O dedi ki, Azərbaycan Böyük Britaniya üçün maraqlı bir ölkədir. İngiltərədə respublika Prezidenti Heydər Əliyevə möhkəm inanırlar və Azərbaycana böyük sərmayə qoymaq istəyirlər. Cənab Hezltaynın fikrincə, müharibənin başa çatması, Azərbaycanda bazar iqtisadiyyatına keçid üçün aparılan islahatların sürətləndirilməsi iqtisadi əlaqələrimizin daha da güclənməsinə səbəb olardı.
Respublikamızın rəhbəri Ermənistan-Azərbaycan müharibəsi haqqında da söhbət açdı. Sonra o, ölkəmizdə iqtisadi islahatların gedişi vəziyyətindən bəhs etdi. Dünyanın ən nüfuzlu maliyyə təşkilatları ilə Azərbaycanın sıx əlaqələrindən danışan Heydər Əliyev bu qurumlardan kreditlər alınmağa başlandığını bildirdi. Prezident dedi ki, istər Con Meycorla, istərsə də Daqlas Hördlə görüşərkən Böyük Britaniyanın da Azərbaycana kreditlər verilməsini xahiş edib. O, çox istərdi ki, cənab Hezltayn da bu məsələlərin həllində köməyini əsirgəməsin.
Xəzər dənizinin statusu ilə əlaqədar bəzi ölkələrin niyyətləri və planlarından bəhs edən Heydər Əliyev dedi ki, Azərbaycan bu statusun müzakirəsində iştirak etməkdən imtina etmir. Ölkəmiz qəbul olunmuş qaydaların qorunmasını və bu sahədə Azərbaycanın hüquqlarının tapdalanmamasını istəyir. Respublika rəhbəri bu məsələdə Böyük Britaniyanın dəstəyinə Azərbaycanın ciddi ehtiyacı olduğunu da vurğuladı.
Azərbaycan Prezidenti neft şirkətləri konsorsiumu ilə ölkəmizin bağladığı müqavilənin həyata keçirilməsi gedişi haqqında da söhbət açdı. “Şahdəniz” yatağının birgə işlənməsi və bununla əlaqədar yeni bir konsorsiumun yaradılması barədə aparılan danışıqlardan bəhs edən Heydər Əliyev Azərbaycanla İngiltərə arasında əməkdaşlığın perspektivlərini yüksək qiymətləndirdi.
Azərbaycan Prezidenti Heydər Əliyev cənab Hezltaynı respublikamıza rəsmi səfərə dəvət etdi. Dəvət məmnuniyyətlə qəbul olundu.
Bölmənin digər xəbərləri
