AZƏRBAYCAN RESPUBLİKASININ PREZİDENTİ HEYDƏR ƏLİYEV QAZAXISTAN RESPUBLİKASININ PREZİDENTİ NURSULTAN NAZARBAYEVLƏ GÖRÜŞMÜŞDÜR
Mehribanlıq və dostluq şəraitində keçən görüş Azərbaycanla Qazaxıstan arasında əməkdaşlığın inkişaf etdirilməsinə dair məsələlərin müzakirəsi ilə başlandı. Tərəflər bu cəhətdən hər iki ölkədə geniş imkanlar olduğunu xüsusi qeyd etdilər və bildirdilər ki, bir sıra sahələrdə birbaşa əlaqələr qurulmasına və bu işin canlandırılmasına ciddi ehtiyac vardır.
Hər iki Prezident Xəzərin statusuna dair öz ölkələrinin mövqelərini açıqladı. Onlar razılığa gəldilər ki, bu məslənin hərtərəfli öyrənilməsinə diqqəti artırsınlar.
Söhbət zamanı Qazaxıstan neftinin xarici ölkələrə ixracında Azərbaycandan çəkiləcək neft kəmərindən istifadə olunması məsələsi də müzakirə obyektinə çevrildi. Belə bir fikir söylənildi ki, Qazaxıstanın bu kəmərə qoşulması hər iki ölkənin mənafeyinə tamamilə uyğundur.
Görüşdə ikitərəfli əlaqələrin perspektivləri, iri müəssisələr arasında birbaşa əlaqələr qurulması barədə də təkliflər irəli sürüldü.
Bölmənin digər xəbərləri
