Hazırda ölkənin telekommunikasiya bazarında aylıq abunə və yerli danışıq haqlarının maya dəyərindən dəfələrlə aşağı qiymətlərlə, beynəlxalq danışıqların isə əksinə, maya dəyərindən yuxarı qiymətlərlə təqdim olunması rabitə operatorlarının itkilərini çarpaz subsidiyalar yolu ilə tənzimlənməsinə gətirib çıxarır, istehlakçıların beynəlxalq danışıq imkanlarını məhdudlaşdırırdı.

Bu cür çatışmazlıqları aradan qaldırmaq məqsədi ilə əhali üçün telefondan istifadəyə görə aylıq abunə haqları və beynəlxalq telefon danışıqları üzrə 2 tarif paketi hazırlanmışdır.

Belə ki, əvvəllər Bakı, Sumqayıt şəhərləri və Abşeron rayonu ərazilərində əhali tərəfindən telefondan istifadəyə görə elektron ATS-lər üçün 66 qəpik, oxşar ATS-lər üçün isə 60 qəpik aylıq abunə haqqı ödənilməklə, MDB ölkələri istiqamətində beynəlxalq danışıqların 1 dəqiqəsi üçün 45 qəpik, İran və Türkiyə istiqamətində 90 qəpik, Avropa ölkələri istiqamətində 1 manat 8 qəpik, Amerika və digər ölkələrlə danışıqların hər dəqiqəsi üçün isə 1 manat 44 qəpik haqq ödənilirdi. Mövcud tarif paketinə alternativ olaraq hazırlanmış I tarif paketində şəhər yerlərində aylıq abunə haqqı elektron ATS-lər üçün 1 manat 50 qəpik, oxşar ATS-lər üçün isə 1 manat 30 qəpik müəyyənləşdirilmişdir. Bu halda MDB ölkələri istiqamətində 1 dəqiqəlik beynəlxalq danışıq tarifi 20 faiz azaldılaraq 36 qəpik, İran və Türkiyə istiqamətində 45 qəpik (mövcud tariflərdən 50 faiz az), Avropa ölkələri istiqamətində 54 qəpik (mövcud tariflərdən 50 faiz az), Amerika və digər ölkələr istiqamətində isə 62,5 faiz azaldılaraq 54 qəpik səviyyəsində müəyyənləşdirilmişdir. Qəbul olunan II tarif paketində isə şəhər ərazilərində yaşayan əhali telefondan istifadəyə görə aylıq abunə haqqını mövcud tariflərə uyğun (elektron ATS-lər üçün 66 qəpik, oxşar ATS-lər üçün 60 qəpik) ödəyəcəyi halda, MDB ölkələri ilə beynəlxalq danışıqlar üçün mövcud tariflər (45 qəpik) saxlanılacaq, İran və Türkiyə istiqamətində 50 faiz azaldılaraq 54 qəpik, Avropa ölkələri istiqamətində 33,3 faiz azaldılaraq 72 qəpik, Amerika və digər ölkələr istiqamətində isə 37,5 faiz azaldılaraq 90 qəpik həddində müəyyən olunmuşdur.

Kənd ərazilərində yaşayan əhali üçün telefondan istifadəyə görə aylıq abunə haqqı elektron ATS-lər üçün 50 qəpik, oxşar ATS-lər 40 qəpik səviyyəsində müəyyənləşdirilmiş, beynəlxalq danışıqların tarifləri MDB ölkələri istiqamətində dəyişdirilməmiş (hər dəqiqə üçün 36 qəpik), İran və Türkiyə istiqamətində 37,5 faiz azaldılaraq 45 qəpik, Avropa ölkələri istiqamətində 40 faiz azaldılaraq 54 qəpik, Amerika və digər ölkələr istiqamətində danışıqlar üçün isə 50 faiz azaldılaraq 54 qəpik olaraq müəyyənləşdirilmişdir.

Rabitə xidmətləri üzrə yeni tariflər paketlərinin seçimi abunəçilərin arzusuna uyğun olaraq aparılacaqdır.

Büdcə təşkilatları və digər kateqoriyadan olan abunəçilər telefondan istifadəyə görə aylıq abunə haqqını mövcud tariflərə uyğun ödəyəcəklər. Bu qurumlar beynəlxalq telefon danışıqları üzrə isə I tarif paketində nəzərdə tutulmuş tariflərə uyğun ödəniş aparacaqlar ki, bu da mövcud tariflərin təqribən 46 faiz azaldılması deməkdir.

Bundan başqa “107” xidmət sahəsi vasitəsilə aparlan hər bir şəhərlərarası və beynəlxalq telefon danışığı üçün xidmət haqqı Bakı, Sumqayıt, Gəncə, Mingəçevir, Əli Bayramlı, Naftalan şəhərlərində, Naxçıvan MR ərazisində və rayon mərkəzlərində 33,3 faiz azaldılaraq 20 qəpik, kənd yerlərində isə 44,4 faiz azaldılaraq 5 qəpik həcmində müəyyəşləşdirilmişdir.

Bunlarla yanaşı, Şuranın iclasında ümumistifadəli telekommunikasiya şəbəkəsində nömrə resurslarının ayrılması və istifadəsi tarifləri barədə Rabitə və İnformasiya Texnologiyaları Nazirliyinin təkliflərinə də baxılmış və müvafiq qərarlar qəbul edilmişdir.

Qəbul olunmuş rabitə tarifləri aidiyyəti üzrə Rabitə və İnformasiya Texnologiyaları Nazirliyi tərəfindən verilmiş lisenziya əsasında və mülkiyyət formasından asılı olmayaraq ümumistifadəli telekommunikasiya şəbəkəsndə fəaliyyət göstərən bütün sabit və mobil şəbəkə operatorlarına şamil olunacaqdır.

Tarif (qiymət) Şurasının iclasında, həmçinin DİN-in Baş Dövlət Yol Polisi İdarəsinin nəzdində fəaliyyət göstərən dayanacaqlara nəqliyyat vasitələrinin təxliyyə avtomobilləri vasitəsilə gətirilməsi və orada saxlanılması xidmətləri üçün tariflərin 1 avtomobil üçün 20 manat, belə nəqliyyat vasitəsinin dayanacaqda bir gün saxlanması üçün isə 0,30 manat məbləğində olması məqsədəuyğun hesab edilmişdir.

İclasda Azərbaycan Meliorasiya və Su Təsərrüfatı Açıq Səhmdar Cəmiyyəti tərəfindən göstərilən xidmətlərin tariflərinə dair təkliflərə də baxılmışdır. Belə ki, təkliflərdə suvarma suyu üçün hesablaşmaların əvvəllər olduğu kimi, hektara görə deyil, verilən suyun həcminə görə aparılması və suvarma suyunun min kubmetrə qədər qiymətinin 0,60 manat səviyyəsində olması təklif edilmişdi.

Təqdim olunan məlumatlar Şuranın katibliyi tərəfindən təhlil edilmiş, kənd təsərrüfatı ilə məğul olan sahibkarların maraqları və sudan qənaətlə istifadənin stimullaşdırılması məqsədi ilə ölçü vahidi olaraq, hektardan kubmetrə keçid barədə təklif qəbul edilmişdur. Belə ki, kənd təsərrüfatı məhsulları istehsalı ilə məşğul olanlar min kubmetr suvarma suyu üçün 0,50 manat ödəyəcəklər. Bir hektar qış otlaq sahələrinə və örüşlərə verilən su üçün də hazırda qüvvədə olan tarifin (hər min kubmetr su üçün 0,40 manat) saxlanılması məqsədəmüvafiq hesab edilmişdir.

Şuranın iclasında Standartlaşdırma, Metrologiya və Patent üzrə Dövlət Agentliyi tərəfindən göstərilən 1000-dən çox xidmət üzrə tariflər də müzakirə edilmiş və müvafiq qərar qəbul olunmuşdur.

Belə ki, ən çox istifadə olunan məişət cihazlarının (elektrik enerjisi, qaz və su sayğacları) yoxlanması tarifləri 0,7 manat səviyyəsində müəyyənləşdirilmişdir.

Ümumiyyətlə, hazırda Agentlik tərəfindən 1000-dən çox xidmət göstərilir. Şuranın qərarına əsasən, bu xidmətlər üzrə zəruri yuvarlaqlaşdırma aparılmış, yalnız 50-dək tarifdə qismən dəyişikliklər edilmişdir.

Şuranın iclasında Nazirlər Kabineti yanında Daşınmaz Əmlakın Dövlət Reyestri Xidməti tərəfindən göstərilən yeni xidmətlərin tarifləri barədə təkliflər də müzakirə olunmuş və onların qəbul olunması məqsədəmüvafiq hesab edilmişdir.

Dövlət Əmlakının İdarə edilməsi üzrə Dövlət Komitəsinin Əmlakın Texniki İnventarlaşdırılması Bürosu tərəfindən göstərilən xidmətlərin tariflərinə də baxılmış və mövcud tarif və əmsallara istehlakçıların mənafeyi baxımından əlavə və dəyişikliklər edilmişdir ki, bu da ümumilikdə tikililərin inventarlaşdırılması və texniki pasportun tərtib edilməsi tariflərinin bir sıra xidmətlər üzrə 10-15 faiz aşağı düşməsi ilə nəticələnəcəkdir.

Tarif (qiymət) Şurası tərəfindən qəbul olunmuş yeni tariflər 2006-cı il mayın 1-dən qüvvəyə minəcəkdir.