AZƏRBAYCAN ŞAHMATÇILARI BRAZİLİYA YIĞMASI ÜZƏRİNDƏ İNAMLI QƏLƏBƏ QAZANMIŞLAR
Bakı, 11 yanvar (AZƏRTAC). Yanvarın 11-də Türkiyənin Bursa şəhərində davam edən komandalararası dünya çempionatının yeddinci turunda Azərbaycan komandası Braziliya yığmasına 3,5:0,5 hesabı ilə qalib gəlmişdir.
Qeyd edək ki, Braziliya yığması ilə görüşdə komandamızın tərkibində bəzi yerdəyişmələr edilmişdir. Birinci taxtada oynayan Vüqar Həşimov Teymur Rəcəbovla əvəzlənmişdir. Onun yerini isə Qadir Hüseynov tutmuşdur.
Şahmatçılarımız bu qarşılaşmada yüksək ustalıq nümayiş etdirərək, görüşü digər komandalardan xeyli əvvəl qurtarmışdır.
Beləliklə, Teymur Rəcəbov Covanni Veskov, Şəhriyar Məmmədyarov Jilberto Miloş, Rauf Məmmədov Andre Diamant üzərində inamlı qələbə qazanmışlar. Qadir Hüseynov isə Aleksandr Fierlə heç-heçə etmişdir.
Bölmənin digər xəbərləri
