AZƏRBAYCAN ŞAHMATÇILARI NÖVBƏTİ MÖHTƏŞƏM QƏLƏBƏ QAZANMIŞLAR
Bakı, 12 yanvar (AZƏRTAC). Yanvarın 12-də Türkiyənin Bursa şəhərində davam edən komandalararası dünya çempionatının səkkizinci turunda Azərbaycan komandası Yunanıstan yığmasına 3:1 hesabı ilə qalib gəlmişdir.
Komandamıza bu turda ilk mühüm xalı beynəlxalq qrossmeyster Şəhriyar Məmmədyarov qazandırmışdır. Ağ fiqurlarla oynayan həmyerlimiz 41-ci gedişdə Stelios Xalkiasla görüşünü qələbə ilə başa vurmuşdur. Bunun ardınca Teymur Rəcəbov Xristos Banikasa xilas yeri qoymayaraq, rəqibini 45-ci gedişdə məğlub etmişdir.
Vüqar Həşimov ilə Vasilios Kotronias və Rauf Məmmədovla Atanasios Mastrovasilis arasındakı görüşlər gərginliyi ilə yadda qalmış və hər ikisi heç-heçə nəticələnmişdir.
Beləliklə, Azərbaycan şahmatçıları dünya çempionatının medalları uğrunda uğurlu bir addım atmışlar.
Son turda komandamız çempionatın liderlərindən olan ABŞ şahmatçıları ilə qarşılaşacaqdır.
Bölmənin digər xəbərləri
