Azərbaycan şirkətlərinə Hindistanın mühəndislik sektoru barədə məlumat verilib
Bakı, 27 oktyabr, AZƏRTAC
Hindistanın Bakıdakı səfirliyi Mühəndislik Məhsullarının İxracının Təşviqi Şurası ilə birlikdə mühəndislik məhsulları üzrə hibrid rejimində vebinar və B2B görüşlər təşkil edib.
AZƏRTAC xəbər verir ki, Hindistanın müstəqilliyinin 75-ci ildönümü ilə əlaqədar təşkil olunan tədbirlərin bir hissəsi olan bu vebinara Hindistanın və Azərbaycanın 40-dan çox müxtəlif mühəndislik şirkətlərinin nümayəndələri qatılıb.
Mühəndislik Məhsullarının İxracının Təşviqi Şurası Hindistanın mühəndislik məhsulları istehsalçılarının və ixracatçılarının milli qurumu olub, Hindistan ixracatçılarına, eyni zamanda mühəndislik məhsullarını Hindistandan təchiz etmək istəyən idxalçılara, habelə beynəlxalq alıcılara köməklik göstərir.
Tədbirin keçirilməsində məqsəd Hindistanın mühəndislik sektoru barədə ətraflı məlumat vermək idi. Tədbirdə Mühəndislik Məhsullarının İxracının Təşviqi Şurasının sədri Maneş Desai Hindistanın mühəndislik sektorunun gücü və ölkəsinin bu sahədə həyata keçirdiyi mövcud dövlət proqramı barədə məlumatı diqqətə çatdırıb.
Tədbirdə çıxış edən səfir Bavitlunq Vanlalvavna Azərbaycanla iqtisadi əlaqələrin şaxələndirilməsi üçün böyük imkanların olduğunu qeyd edib. O, Hindistanın mühəndislik məhsullarının Azərbaycan bazarında artıq tanındığını, belə ki, istər neft, istərsə də qeyri-neft sektoru üçün reaktorlar, qazanlar, nasoslar, klapanlar və sair kimi müxtəlif mühəndislik məhsullarının idxal olunduğunu və ölkədə istifadə edildiyini bildirib. Vurğulayıb ki, Hindistan mühəndislik sektoru ildə 76 milyard ABŞ dolları dəyərində məhsul ixrac edir və bu sahədə hər iki ölkə arasında əməkdaşlıq əlaqələrini artırmaq üçün daha çox imkanlar mövcuddur.
Statistik məlumatlara əsasən, Hindistan və Azərbaycan arasında ikitərəfli ticarət dövriyyəsi cari ilin yanvar-sentyabr ayları üzrə ötən illə müqayisədə 20,1 faiz artaraq, 610,1 milyon ABŞ dolları təşkil edib. Hindistan bu dövrdə Azərbaycanın 8-ci əsas ticarət tərəfdaşı olub. Azərbaycandan Hindistana ixrac 503,2 milyon ABŞ dolları təşkil edərək, 22 faiz artıb. Hindistanın Azərbaycanın ümumi ixracındakı payı bu dövrdə 3,4 faiz olmaqla ölkəmiz üçün 8-ci əsas ixrac məkanı olub. Cari ilin yanvar-sentyabr aylarında Azərbaycanın Hindistandan idxalı isə ötən ilin eyni dövrü ilə müqayisədə 12,2 faiz artaraq, 106,9 milyon ABŞ dolları təşkil edib.
Bölmənin digər xəbərləri
