ELM VƏ TƏHSİL
Azərbaycan Tibb Universiteti ilə Ankara Universiteti arasında əməkdaşlığa dair müqavilə imzalanmışdır
Bakı, 31 oktyabr (AZƏRTAC). Oktyabrın 31-də Türkiyənin Ankara Universitetinin rektoru, professor Erkan İbişin rəhbərlik etdiyi nümayəndə heyəti Azərbaycan Tibb Universitetində (ATU) olmuşdur.
AZƏRTAC xəbər verir ki, görüşdə Azərbaycan Tibb Universitetinin rektoru, Milli Məclisin deputatı, akademik Əhliman Əmiraslanov Azərbaycan Prezidenti İlham Əliyevin təhsilə daim xüsusi önəm verdiyini vurğulamışdır. Rektor, eyni zamanda, oktyabrın 31-də işə başlamış III Bakı Beynəlxalq Humanitar Forumunun əhəmiyyətini xatırlatmışdır.
Azərbaycan ilə Türkiyənin tarixi birliyindən, mehriban qardaşlıq münasibətlərindən danışan akademik Ə.Əmiraslanov ATU ilə Türkiyə universitetləri arasında əməkdaşlığın genişləndirilməsi barədə fikirlərini diqqətə çatdırmışdır.
Görüşdən məmnun qaldığını bildirən Türkiyənin Ankara Universitetinin rektoru, professor Erkan İbiş təhsil əlaqələrimizin səmərəli olacağına əminliyini vurğulamışdır.
Təhsil sahəsində əməkdaşlığın inkişafı üzrə geniş fikir mübadiləsi aparılmışdır.
Sonra Azərbaycan Tibb Universiteti ilə Ankara Universiteti arasında əməkdaşlığa dair müqavilə imzalanmışdır.
Sənəddə tələbə mübadiləsi, birgə seminar və konfransların keçirilməsi və s. nəzərdə tutulmuşdur.