Azərbaycan Tibb Universitetində Türkiyə-Azərbaycan terapevtlərinin seminarı keçiriləcək
Bakı, 23 iyun, AZƏRTAC
Azərbaycan Tibb Universitetinin (ATU) rektoru, akademik Əhliman Əmiraslanov Türkiyə Daxili Xəstəliklər Mütəxəssisləri Dərnəyinin rəhbəri, professor Serhat Ünal ilə görüşüb.
Universitetdən AZƏRTAC-a bildirilib ki, görüşdə S.Ünal rəhbərlik etdiyi qurumun təşkil etdiyi Türkiyə-Azərbaycan terapevtlərinin seminarını noyabrın 20-dən 22-dək ATU-da keçirmək niyyətində olduqlarını söyləyib.
Türkiyəli professor qeyd edib ki, dərnəyin məqsədi daxili xəstəliklərlə əlaqədar şəxsləri və qardaş ölkələrin bu sahə üzrə mütəxəssislərini bir araya gətirmək, onlar arasında əlaqələri möhkəmləndirmək, geniş müzakirələr aparmaq, mühazirələr oxumaqdır.
Akademik Ə.Əmiraslanov bu cür dərnəklərin ATU-da keçirilməsinə müsbət yanaşdığını, bu ali təhsil ocağının qardaş Türkiyə universitetləri ilə sıx əlaqə saxladığını, belə tədbir və seminarların tez-tez keçirildiyini deyib.
Bölmənin digər xəbərləri
