Azərbaycan türkologiyası Türk dünyası ölkələrinin elmi mühitində özünəməxsus yeri ilə seçilir
Bakı, 27 noyabr, AZƏRTAC
Azərbaycan türkologiyası Türk dünyası ölkələrinin elmi mühitində özünəməxsus yeri və ağırlığı ilə seçilir. Təbii ki, Azərbaycan türkologiyasının spesifikası onun möhkəm təməllər üzərində qurulması ilə xarakterizə olunur. İstər bu amil, istərsə də elmin hazırda inkişaf təmayülləri onu deməyə əsas verir ki, ölkəmizdə türkoloji düşüncənin əsasında mühüm elmi məktəblər dayanır. Azərbaycanda türkoloji düşüncənin inkişafına Əli bəy Hüseynzadə, Bəkir Çobanzadə kimi böyük alimlər töhfələr veriblər. Onların qoyduğu möhkəm təməllər üzərində Azərbaycan türkologiyası öz inkişaf təmayüllərini müəyyənləşdirib. Şübhəsiz ki, Birinci Türkoloji qurultayın ölkəmizdə keçirilməsi də bunun bariz nümunələrindən biridir.
Bu fikirləri AZƏRTAC-a müsahibəsində Bakı Dövlət Universitetinin Azərbaycan dili və nitq mədəniyyəti kafedrasının müəllimi Pərvin Eyvazov söyləyib.
P.Eyvazov bildirib ki, Azərbaycan türkologiyasında Əbdüləzəl Dəmirçizadə, Muxtar Hüseynzadə, Məmmədağa Şirəliyev, Şəmsəddin Cəfərov, Yusif Seyidov, Fərhad Zeynalov, Əlövsət Abdullayev, Məmməd Adilov, Ağamusa Axundov, Samət Əlizadə, Tofiq Hacıyev, Ramiz Əskər, Əbülfəz Rəcəbli, Nizami Cəfərov və onlarla başqa dilçi-türkoloqun adını qeyd etmək olar ki, onlar nəinki Azərbaycanda, ölkəmizin hüdudlarından kənarda tanınmış, Azərbaycan türkologiyasını layiqincə təmsil etmiş böyük simalardır.
Həmçinin qeyd olunmalıdır ki, 1919-cu ildə milli-ideoloji düşüncənin ən parlaq təsisatlarından biri olan Bakı Dövlət Universiteti əsası qoyulduğu vaxtdan həmişə Azərbaycanda aparıcı türkoloji mərkəz hesab olunub. Bəkir Çobanzadənin gərgin elmi-pedaqoji fəaliyyəti nəticəsində BDU-da formalaşan ümumi dilçilik və türkologiya məktəblərinin yetirmələrinin Azərbaycan humanitar elminə verdiyi misilsiz töhfələr ölkəmizin sərhədlərindən kənarda da kifayət qədər tanınır. Ölkəmizə xaricdən gələn nüfuzlu elm adamlarının BDU ilə sıx elmi-pedaqoji əlaqələri olub. Bu gün də həmin əlaqələr həm mütəxəssislər, həm də ali təhsil və elmi-tədqiqat müəssisələri səviyyəsində uğurla davam edir. Ölkəmizdə ilk dəfə 1969-cu ildə BDU-da yaradılmış Türkologiya kafedrası Azərbaycan türkologiyasına tanınmış simalar bəxş edib ki, bu gün onlar həm AMEA-nın Dilçilik İnstitutunda, həm də ölkəmizin digər ali təhsil müəssisələrində çalışmaqla yanaşı, Azərbaycan türkologiyasını beynəlxalq miqyasda uğurla təmsil edirlər. Azərbaycan türkologiyasının elmi-nəzəri səviyyəsi həmişə beynəlxalq türkoloji düşüncə miqyasında yüksək qiymətləndirilib, eyni zamanda, türkoloji dilçiliyin dialektologiya, müasir dil və dil tarixşünaslığı sahəsində aparılan tədqiqatların nəticələrindən xarici elm adamları layiqincə bəhrələniblər və bu uğurun ağırlıq mərkəzində həm də Bakı Dövlət Universitetində formalaşdırılmış türkoloji mühit dayanır.
Bölmənin digər xəbərləri
