AZƏRBAYCAN-UKRAYNA İŞÇİ QRUPUNUN 3-CÜ İCLASI KEÇİRİLƏCƏKDİR
İqtisadi İnkişaf Nazirliyinin mətbuat xidmətindən AZƏRTAC-a bildirmişlər ki, iyulun 8-də Ukraynanın paytaxtı Kiyevdə kiçik və orta sahibkarlığın inkişafı üzrə Azərbaycan-Ukrayna işçi qrupunun 3-cü iclası keçiriləcəkdir.
İclasda xüsusi iqtisadi zonaların yaradılması, ixracın dəstəklənməsi mexanizmləri, kiçik, orta və iri sahibkarlıq subyektləri arasında korporativ əlaqələrin qurulması, innovasiya sahibkarlığının inkişafına kömək göstərilməsi məsələləri müzakirə olunacaqdır.
İyulun 9-da isə Azərbaycan və Ukrayna iş adamlarının iştirakı ilə biznes-forum təşkil ediləcəkdir. Forumda Azərbaycan tərəfindən kənd təsərrüfatı məhsulları, tikinti materialları və mebel istehsalı, bank, sığorta, audit və konsaltinq, tibbi xidmət sahələrində fəaliyyət göstərən 20-dən artıq sahibkarın iştirakı nəzərdə tutulur. Ukrayna tərəfdən isə biznes-forumda 60-dan artıq iş adamının iştirakı gözlənilir.
Biznes-forum sahibkarlar arasında işgüzar əməkdaşlığın genişlənməsinə, tərəfdaşlıq əlaqələrinin inkişafına yeni təkan verəcəkdir.
Bölmənin digər xəbərləri
