AZƏRBAYCAN VƏ LİTVA PREZİDENTLƏRİNİN GENİŞ TƏRKİBDƏ GÖRÜŞÜ
İyunun 8-də Prezident sarayında təkbətək görüşdən sonra Azərbaycan Prezidenti İlham Əliyevin və Litva Prezidenti Valdas Adamkusun nümayəndə heyətlərinin iştirakı ilə geniş tərkibdə görüşü keçirilmişdir.
Azərbaycan Prezidenti İlham Əliyev Litva Prezidenti Valdas Adamkusu bir daha salamlayaraq xatırlatdı ki, biz bundan əvvəl bir çox beynəlxalq tədbirlər çərçivəsində də görüşmüşük. Mən çox şadam ki, Litva Prezidenti kimi Siz Azərbaycana ilk rəsmi səfərinizi edirsiniz. Bu rəsmi səfər iki ölkə arasındakı münasibətlərin daha da inkişaf etdirilməsi, daha da şaxələndirilməsi üçün yeni imkanlar açır.
Dövlətimizin başçısı Litvanın Avropa İttifaqının üzvü olduğunu xatırladaraq dedi ki, Azərbaycan da Avropa təsisatlarına sürətlə inteqrasiya edir. Bu baxımdan, biz Litvanın təcrübəsindən, dəstəyindən yararlana bilərik.
Ölkələrimiz arasındakı iqtisadi-ticarət əlaqələrinə toxunan Prezident İlham Əliyev bildirdi ki, bu əlaqələr inkişaf etməlidir. Siz Azərbaycana böyük nümayəndə heyəti ilə gəlmisiniz. Nümayəndə heyətinizdə üç nazirdən əlavə, Litvanın iş adamları da var və onlar burada iştirak edirlər. İyunun 9-da biznes forum keçiriləcəkdir. Bütün bunlar ölkələrimiz arasında dostluq və əməkdaşlıq münasibətlərinin yeni inkişaf mərhələsindən xəbər verir. Biz eyni zamanda çoxtərəfli münasibətlər, beynəlxalq təşkilatlar çərçivəsində əməkdaşlıq etməyi və çox mühüm regional layihələrdə Litva ilə birgə işləməyi arzulayırıq.
Azərbaycana ilk dəfə rəsmi səfərindən məmnun qaldığını bildirən Litva Prezidenti Valdas Adamkus bu səfərini tarixi hadisə kimi qiymətləndirdi. Litva rəhbəri vurğuladı ki, ölkələrimiz indiyədək bir çox nailiyyətlər əldə edibdir və biz bundan qürur duyuruq. Bu baxımdan güclü dövlətlərə çevrilən Litvanın və Azərbaycanın beynəlxalq məsələlərdə və dünya birliyində oynadığı rol get-gedə artır.
Litva Prezidenti dedi ki, biz hesab edirik, Azərbaycanın Avropa İttifaqına qoşulması baş tuta bilər. Bunun üçün həmin təşkilata namizəd ölkələr kimi Azərbaycanın da vaxt cədvəli olmalıdır. Təbii ki, burada müəyyən tələblər qoyulur və onların yerinə yetirilməsində bəzi hallarda maneələr olur, lakin biz bu inteqrasiya məsələlərinin həllində Azərbaycana kömək göstərməyə hazırıq. Əgər bu sahədə birgə işləsək, Avropa İttifaqına aparan yolda bizim buraxdığımız səhvləri siz təkrar etməzsiniz.
Azərbaycana çoxlu iş adamları ilə gəldiyini xatırladan Prezident Valdas Adamkus bildirdi ki, keçiriləcək biznes forum zamanı onlar azərbaycanlı həmkarları ilə əməkdaşlıq imkanlarını araşdıracaqlar. Litva rəhbəri ölkəmizlə enerji daşıyıcıları sahəsində də əməkdaşlıq etmək arzusunda olduqlarını söylədi.
Cənab Adamkus Prezident İlham Əliyevə müraciətlə dedi ki, ölkəniz iqtisadi cəhətdən gücləndikcə, siyasi cəhətdən də get-gedə güclənir. Bu da təbiidir. Biz Azərbaycan Prezidentini əmin edirik ki, Litva indiyədək olduğu kimi, bundan sonra da beynəlxalq məsələlərdə, ikitərəfli münasibətlərdə Azərbaycanın etibarlı və güclü müttəfiqi olacaqdır.
Görüşdə hökumətlərarası birgə iqtisadi komissiyanın yaradılması və onun yaxın vaxtlarda işə başlaması barədə razılıq əldə edildi.
Bölmənin digər xəbərləri
