Azərbaycan və Türkiyə əsl qardaşlıq, dostluq və yekdillik nümunəsi göstərdilər
Moskva, 29 oktyabr, AZƏRTAC
Azərbaycan və Türkiyə növbəti dəfə əsl qardaşlıq, dostluq və yekdillik və ortaq ideallara sədaqət nümunəsi göstərdilər.
Rusiya Vəkillər Gildiyasının vitse-prezidenti, Rusiya Federasiyasının Fəxri vəkili İlqar Hacıyev AZƏRTAC-ın müxbiri ilə söhbətində bu barədə danışıb.
İ.Hacıyev deyib: “Biz tarixi vətənimizdən uzaqda yaşasaq da, doğma Azərbaycanda baş verən hadisələrə laqeyd qala bilmərik. Rəşadətli Azərbaycan Ordusu Ali Baş Komandan İlham Əliyevin rəhbərliyi ilə separatistləri həm fiziki, həm də mənəvi cəhətdən məhv edərək doğma torpaqlarımızı işğalçılardan azad edəndən sonra xalqımızın ruhunun necə yüksəldiyini qürur hissi ilə müşahidə edirik. Azərbaycan torpaqlarında tarixi ədalət Zəfər çaldı, Vətənimizin ərazi bütövlüyü bərpa edildi. Əlamətdar haldır ki, böyük Zəfərdən dərhal sonra işğaldan azad edilmiş torpaqlarda bərpa işləri başlanıb. Mən 2021-ci ilin yayında Şuşada olarkən tikinti işlərinin fasiləsiz aparılmasını, gecə-gündüz yollar salınmasını, elektrik xətləri çəkilməsini öz gözümlə görüb yəqin etdim. Ərazilər minalardan təmizlənir və bundan dərhal sonra yaşayış binalarının, sosial infrastruktur obyektlərinin tikintisi başlanır. Füzuli şəhərində cəmi 8 ay ərzində tikilmiş beynəlxalq aeroport buna əyani nümunədir”.
Rusiya Vəkillər Gildiyasının vitse-prezidenti daha sonra qeyd edib ki, Azərbaycan Respublikasının Prezidenti İlham Əliyev bərpa işlərinin icrasını şəxsən izləyir, işğaldan azad edilmiş Qarabağda və ona bitişik rayonlarda vəziyyəti demək olar ki, daim nəzarətdə saxlayır.
Həmvətənimiz vurğulayıb ki, beynəlxalq hökumət və qeyri-hökumət nümayəndə heyətləri vaxtaşırı Qarabağa səfər edir, şəxsən yəqin edirlər ki, erməni işğalçıları bu diyara necə böyük ziyan vurub və biz indi sosial-mədəni təyinatlı obyektləri, tarixi abidələri, dağıdılmış məscidləri və məbədləri necə bərpa edirik. Qardaş Türkiyə bu məsələdə də Azərbaycanı dəstəkləyir. Azərbaycan və Türkiyə növbəti dəfə əsl qardaşlıq, dostluq və yekdillik və ortaq ideallara sədaqət nümunəsi göstərdilər.
Digər həmvətənimiz -Zeynalabdin Tağıyev adına Xeyriyyə Fondunun icraçı direktoru, iqtisad elmləri namizədi Aybəniz Rüstəmova da Qarabağda bərpa işlərində Türkiyənin iştirakının vacibliyini vurğulayıb.
A.Rüstəmova deyib: “Biz qardaş Türkiyə Respublikasının hərtərəfli dəstəyini daim hiss edirik. Türkiyə Respublikasının Prezidenti Rəcəb Tayyib Ərdoğanın Azərbaycana tez-tez rəsmi səfərləri, o cümlədən oktyabrın 26-da başa çatmış növbəti səfəri buna nümunədir. Türkiyə lideri öz ölkəsinə qayıdarkən ümidvar olduğunu bildirib ki, yaxın vaxtlarda Füzuli-İstanbul birbaşa nəqliyyat marşrutu da təşkil ediləcək. Ərdoğan Zəngilan rayonunun Ağalı kəndindəki çıxışında Azərbaycan ilə Türkiyə arasında əməkdaşlığın intensiv inkişaf etməsini dəfələrlə vurğulayıb. Hələlik isə, işğaldan azad edilmiş torpaqların distant idarəetmə metodu ilə minalardan təmizlənməsi işləri qardaş ölkənin köməyi ilə sürətlə həyata keçirilir, kənd təsərrüfatlı təyinatlı yüz minlərlə hektar torpaq tədricən canlanır. Azərbaycan və Türkiyə şirkətləri vaxtilə bərəkətli diyar kimi tanınmış bu ərazini dirçəltmək və sakinləri öz doğma evlərinə, yurdlarına qaytarmaq üçün çiyin-çiyinə çalışırlar. Zəngilan rayonunda birinci özəl investisiya layihəsinin təməlinin qoyulması həqiqətən tarixi əhəmiyyətli hadisədir. Bu müştərək Türkiyə-Azərbaycan layihəsi yalnız quruculuğa, Vətən torpaqlarının daha da firavanlaşmasına yönəlib. Zəngəzur dəhlizinin bir hissəsi olacaq yeni avtotrasın təməli qoyulub. Bu tras sıx əməkdaşlıq və qarşılıqlı fəaliyyət, region iqtisadiyyatının inkişafı üçün yeni üfüqlər açacaq”.
Onun sözlərinə görə, Rusiya Federasiyasındakı Azərbaycan diasporu ölkəmizdə hadisələrin inkişafını daim izləyir və doğma Azərbaycana maksimum xeyir vermək üçün əlindən gələni etməyə hazırdır.
A.Rüstəmova daha sonra deyib: “Biz ölkəmizlə, Azərbaycan xalqının milli ləyaqətini və maraqlarını qoruyan və müdafiə edən Prezidentimiz İlham Əliyevlə fəxr edirik. Zəfər Gününün ildönümü ərəfəsində inamla deyə bilərik ki, biz daha bir qələbə qazanmışıq - işğaldan azad edilmiş Qarabağı və digər rayonları çiçəklənən diyara çevirmək, sosial-iqtisadi inkişafın nümunəvi modelini bütün dünyaya göstərmək üçün bir ildən az müddətdə hər cür ilkin şərait yaradılıb”.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
