AZƏRBAYCAN VƏ TÜRKMƏNİSTANIN NEFT-QAZ POTENSİALINA HƏSR OLUNACAQ KONFRANSIN GÜNDƏLİYİ AÇIQLANMIŞDIR
AZƏRTAC xəbər verir ki, bu il sentyabrın 9-10-da Bakıda keçiriləcək “Azərbaycan və Türkmənistanın neft-qaz potensialı: energetika, iqtisadiyyat, ekologiya və strateji əməkdaşlıq” konfransının gündəliyi açıqlanmışdır. Azərbaycan Sənaye və Energetika Nazirliyinin (SEN) mətbuat xidmətinin rəhbəri Azər Mənsimli bildirmişdir ki, konfrans Azərbaycan Baş nazirinin birinci müavini Yaqub Eyyubov və Türkmənistan Nazirlər Kabineti sədrinin müavini Taçberdi Tağıyevin həmsədrliyi ilə keçiriləcəkdir. Azərbaycanın sənaye və energetika naziri Natiq Əliyevin, Türkmənistanın neft-qaz sənayesi və mineral sərvətlər naziri Baymırat Xocaməhəmmədovun, Strateji Planlaşdırma və İqtisadiyyat İnstitutunun direktorunun, “Türkmənqaz” Dövlət Konserni rəhbərinin və başqalarının çıxışları nəzərdə tutulur.
Konfrans öz işini “Qlobal tendensiyalar və dünya energetikasının inkişafı”, “Azərbaycan və Türkmənistanın neft-qaz ehtiyatlarının qiymətləndirilməsi”, “Regional əməkdaşlıq və neft-qaz komplekslərinin inkişafı. Beynəlxalq və regional investisiya layihələri”, “Yeni texnologiyaların tətbiqi: iqtisadiyyat, ekologiya, elm və təhsil” bölmələrində davam etdirəcəkdir.
Tədbirə Azərbaycan və Türkmənistanda fəaliyyət göstərən xarici şirkətlər, beynəlxalq maliyyə institutları və korporasiyaların nümayəndələri də qatılacaqlar. Konfransda ABŞ Dövlət Departamentinin Avrasiya Enerji məsələləri üzrə əlaqələndiricisi Stiven Mənnin iştirakı gözlənilir.
Bölmənin digər xəbərləri
