AZƏRBAYCAN YIĞMA KOMANDASI 49 ÖLKƏNİN YARIŞDIĞI AVROPA OLİMPİYA FESTİVALINDA 6-CI YERİ TUTMUŞDUR
AZƏRTAC xəbər verir ki, Belqradda gənclər arasında Avropa Olimpiya Festivalı başa çatmışdır. Yarışların sonuncu günü yığma komandamıza daha bir qızıl medalı cüdoçu Şahin Qəhrəmanov qazandırmışdır.
90 kiloqram çəki dərəcəsində yarışan Ş.Qəhrəmanov finalda Bosniya və Herseqovina idmançısı Dorde Kisina qalib gələrək fəxri kürsünün ən yüksək pilləsinə qalxmışdır. Buna qədər isə daha üç cüdoçumuz - Vüqar Şirinli (50 kq), Elsevər Sadıqzadə (55 kq), Sərxan Əhmədov (60 kq) Olimpiya Festivalının qalibi olmuşlar.
Yarışlarda uğurlu nəticələr silsiləsini atletlərimiz davam etdirmişlər. Ramin Quliyev 100 və 200 metr məsafəyə qaçışda, Ənvər Zeynalzadə isə üç təkanla uzunluğa tullanma yarışlarında qızıl medala sahib olmuşlar.
Beləliklə, ümumilikdə 7 qızıl medal qazanan Azərbaycan yığması 49 ölkənin yarışdığı Avropa Olimpiya Festivalında Rusiya, Böyük Britaniya, İtaliya, Almaniya və Ukrayna komandalarından sonra altıncı yeri tutmuşdur.
Bölmənin digər xəbərləri
