Azərbaycanda 1988-1993-cü illərdə baş vermiş hadisələr təhlil olunmuşdur
Bakı, 25 fevral (AZƏRTAC). Fevralın 25-də Nizami Kino Mərkəzində Ədliyyə Nazirliyinin müxtəlif qurumları əməkdaşlarının iştirakı ilə Xocalı soyqırımı qurbanlarının xatirəsini anma mərasimi keçirilmişdir.
Mərkəzin mətbuat xidmətindən AZƏRTAC-a bildirmişlər ki, tədbiri açan ədliyyə nazirinin müavini, Penitensiar Xidmətin rəisi, ədliyyə general-leytenantı Mədət Quliyev 1988-1993-cü illərdə Azərbaycanda baş verən hadisələrdən danışmışdır.
Penitensiar Xidmətin rəisi demişdir ki, məhz ulu öndər Heydər Əliyevin düzgün siyasi və iqtisadi siyasəti nəticəsində ölkəmiz böhranlı vəziyyətdən çıxmış, Xocalı soyqırımını törədən erməni təcavüzkarları ifşa olunmuşlar.
Ulu Öndərin layiqli davamçısı Prezident İlham Əliyevin səyləri nəticəsində bu gün ölkəmizin dünyada lider dövlətlər sırasında öz yerini tutduğu qeyd edilmişdir.
Tədbir çərçivəsində ANS şirkətlər qrupunun və “Bakıfilm”in istehsalı olan “Xoca” filmi nümayiş etdirilmişdir.
ANS şirkətlər qrupunun vitse-prezidenti Mirşahin Ağayev film haqqında ətraflı məlumat vermişdir.
Sonda Mədət Quliyev tədbirin keçirilməsinə yaratdığı şəraitə görə Nizami Kino Mərkəzinin kollektivinə minnətdarlığını bildirmişdir.
Bölmənin digər xəbərləri
