Azərbaycanda aparılmış Demoqrafiya və sağlamlıq sorğusunun nəticələri açıqlanmışdır
Bakı, 7 fevral (AZƏRTAC). Azərbaycanda 2011-ci ildə aparılmış Demoqrafiya və sağlamlıq sorğusunun nəticələri ilə bağlı fevralın 7-də Bakıdakı “Hyatt Regency” hotelində konfrans keçirilmişdir.
AZƏRTAC xəbər verir ki, konfransda Səhiyyə Nazirliyinin məsul işçiləri, Milli Məclisin deputatları, müvafiq dövlət, beynəlxalq və qeyri-hökumət təşkilatlarının nümayəndələri iştirak etmişlər.
Konfransı giriş sözü ilə açan səhiyyə nazirinin müavini Elsevər Ağayev bildirmişdir ki, Demoqrafiya və sağlamlıq sorğusu (DSS-2011) Azərbaycan Respublikası Prezidentinin 15 sentyabr 2008-ci il tarixli Sərəncamı ilə təsdiq edilmiş “2008-2015-ci illərdə Azərbaycan Respublikasında yoxsulluğun azaldılması və davamlı inkişaf Dövlət Proqramı” çərçivəsində Səhiyyə Nazirliyi tərəfindən həyata keçirilmiş və nəticələrinə dair hesabat hazırlanmışdır. Sorğunun keçirilməsi əhalinin rifah halının yaxşılaşdırılması istiqamətində əldə olunmuş nailiyyətlərin davam etdirilməsi, yoxsulluq səviyyəsinin azaldılması, habelə bununla bağlı BMT-nin qəbul etdiyi Minilliyin İnkişaf Məqsədlərindən irəli gələn vəzifələrin yerinə yetirilməsi üçün zəruri şərtlərdən biridir. Azərbaycanda ilk belə sorğu 2006-cı ildə Dövlət Statistika Komitəsi tərəfindən keçirilmişdir.
Nazir müavini demişdir ki, ana və uşaqlara göstərilən tibbi xidmətin keyfiyyətinin yaxşılaşdırılması dövlətin sosial yönümlü siyasətinin əsas prioritet istiqamətlərindən biridir. Ölkə rəhbərliyinin bilavasitə dəstəyi ilə son illər bu sahədə mühüm tədbirlər həyata keçirilmişdir. Ana və uşaqların sağlamlığının qorunması üzrə dövlət proqramının, həmçinin yeni doğulanların “Elektron sağlamlıq kartları” ilə təmin edilməsi, “Yoluxucu xəstəliklərinin immunoprofilaktikası” proqramlarının ana və uşaqların sağlamlığının qorunması işində əhəmiyyətli rolu olmuşdur.
Bildirilmişdir ki, son illər ərzində ana və uşaqlara tibbi xidmət göstərən müəssisələrin maddi-texniki bazası möhkəmləndirilmiş, onların dərman preparatları və tibbi texnika ilə təminatı yaxşılaşdırılmışdır. Bakı şəhərində yerləşən bütün uşaq poliklinikaları əsaslı təmir edilərək müasir tibb avadanlığı ilə təmin olunmuşdur. Regionlarda fəaliyyət göstərən uşaq tibb müəssisləri yeni tikilmiş və təmir olunmuş binalara köçürülür.
E.Ağayev diqqətə çatdırmışdır ki, respublikamızda həyata keçirilən bu tədbirlərin nəticəsində ana və uşaqların sağlamlığını xarakterizə edən göstəricilərdə müsbət dinamika müşahidə olunur. Azərbaycanda 2003-cü ildə körpə ölümü göstəricisi 16,7 promille idisə, 2013-cü ildə bu rəqəm 10,8-ə bərabər olmuşdur. Ana ölümü əmsalı 2003-cü illə müqayisədə 18,5-dən 14,5-a enmişdir. Son 10 ildə ölkəmizdə doğum göstəricisi 8-dən 15,6 promilleyə qalxmışdır.
Səhiyyə Nazirliyi İctimai Səhiyyə və İslahatlar Mərkəzinin (İSİM) direktoru Ceyhun Məmmədov isə Demoqrafiya və sağlamlıq sorğusunun mahiyyəti və verə biləcəyi töhfələrdən danışmışdır.
Qeyd olunmuşdur ki, “DSS-2011” Azərbaycanda əhali, sağlamlıq və qidalanma üzrə mövcud vəziyyətin əsas göstəricilərini əks etdirir. Sorğu 9 iqtisadi rayonda - Bakı, Abşeron, Gəncə-Qazax, Şəki-Zaqatala, Quba-Xaçmaz, Aran, Lənkəran, Qarabağ və Dağlıq Şirvanda 7041 ev təsərrüfatında 15-49 yaşlı 9341 qadın arasında aparılmışdır. Sorğu zamanı ev təsərrüfatlarının xüsusiyyətləri, sosial-iqtisadi göstəricilər, antropometriya, təhsil, körpə və 5 yaşadək uşaq ölümü, ana və uşaqların sağlamlığı, gender münasibətləri və qadınların ailədə səlahiyyətləri, fertillik, arzu olunan uşaqların sayı, ailə vəziyyəti, ailə planlaşdırılması, qidalanma, yetkinlik yaşına çatanların sağlamlığı, QİÇS, cinsi yolla yayılan xəstəliklər ilə bağlı məlumatlar toplanılmışdır.
Sonra İSİM-in şöbə müdirləri və əməkdaşlarının Demoqrafiya və sağlamlıq sorğusunun təşkili və həyata keçirilməsi mərhələləri, nəticələri ilə bağlı məruzələri dinlənilmişdir.
Məlumat verilmişdir ki, sorğuya əsasən 2006-cı ildə keçirilmiş analoji sorğunun nəticələri ilə müqayisədə ölkəmizdə neonatal ölüm 21 faiz, postneonatal ölüm 33 faiz, körpə ölümü 25 faiz, beş yaşadək ölüm 20 faiz, hər 1000 qadına düşən abortların sayı isə 28.5 faiz azalmışdır.
Sorğuda iştirak edən bütün qadınların 87.1 faizinin, evli qadınların isə 97.2 faizinin ən azı bir kontrasepsiya üsulu haqqında məlumatlı olduqları müəyyən edilmişdir. Məlum olmuşdur ki, evli qadınların təxminən 14 faizi müasir üsullardan, 41 faizi isə ənənəvi üsullardan istifadə edirlər.
Sonra məruzələr ətrafında müzakirələr aparılmışdır.
Bölmənin digər xəbərləri
