Azərbaycanın enerji potensialı qlobal bazarlarda strateji üstünlüyə çevrilir – Ekspert rəyi
Bakı, 14 iyul, AZƏRTAC
Son illərdə qlobal enerji bazarında baş verən geosiyasi dəyişikliklər, xüsusilə də Rusiya-Ukrayna müharibəsindən sonra Avropanın alternativ enerji mənbələrinə artan tələbatı Azərbaycanın enerji siyasətini yeni mərhələyə çıxarıb. Təbii qaz ixracının coğrafiyasının genişlənməsi, hasilatın artırılması, bərpaolunan enerji hesabına əlavə ixrac potensialının yaradılması və yeni bazarlara çıxış ölkənin uzunmüddətli enerji strategiyasının əsas istiqamətlərinə çevrilib. Prezident İlham Əliyevin IV Şuşa Qlobal Media Forumunda səsləndirdiyi fikirlər də göstərir ki, Azərbaycan mövcud enerji imkanlarını yalnız iqtisadi gəlir mənbəyi kimi deyil, həm də regional və qlobal enerji təhlükəsizliyində strateji alət kimi dəyərləndirir. Dövlətimizin başçısı bildirib ki, Azərbaycan boru kəmərləri vasitəsilə qaz ixracının coğrafi əhatəsinə görə dünyada birinci yerdədir. Azərbaycan Prezidenti diqqətə çatdırıb ki, 2022-ci ildən etibarən ölkəmizdən Avropa İttifaqına qaz tədarükü 65 faiz artırılıb və bu göstəricinin gələcəkdə də yüksələcəyi gözlənilir.
Neft Araşdırmaları Mərkəzinin rəhbəri İlham Şaban mövzu ilə bağlı AZƏRTAC-a açıqlamasında bildirib ki, Prezident İlham Əliyevin IV Şuşa Qlobal Media Forumunda Azərbaycanın Avropaya qaz ixracını artırmaq planları ilə bağlı açıqlaması ölkənin mövcud enerji tərəfdaşlığını daha da dərinləşdirməyə çalışdığını göstərir.
“Yeni bazarlara çıxış ilk növbədə ixrac gəlirlərinin artması, valyuta daxilolmalarının çoxalması və dövlət büdcəsinin, eləcə də Dövlət Neft Fondunun gəlirlərinin güclənməsi baxımından mühüm əhəmiyyət daşıyır. Eyni zamanda, alıcı ölkələrin sayının artması Azərbaycanın hər hansı bir bazardan asılılığını azaldır və onun Avropanın enerji təhlükəsizliyində strateji rolunu daha da möhkəmləndirir. Bu, təkcə iqtisadi deyil, həm də siyasi dividend yaradır, çünki ölkələr arasında qarşılıqlı münasibətlərin inkişafına yol açır”, - deyə o qeyd edib.
Prezident İlham Əliyevin açıqlamaları göstərir ki, Azərbaycanın enerji siyasəti artıq yalnız mövcud ehtiyatların ixracına deyil, dəyişən qlobal enerji balansına uyğun çevik və uzunmüddətli strategiyanın həyata keçirilməsinə əsaslanır. Avropada artan tələbat, yeni bazarlara çıxış imkanları, hasilatın genişləndirilməsi və bərpaolunan enerji layihələrinin sürətlə inkişafı ölkəyə qaz ixracını artırmaq üçün əlavə imkanlar yaradır. Bununla yanaşı, infrastrukturun genişləndirilməsi, uzunmüddətli kommersiya müqavilələrinin təmin olunması və maliyyələşmə məsələlərinin həlli qarşıdakı dövrün əsas çağırışları olaraq qalır.
Bütün bunlar onu göstərir ki, Azərbaycan enerji resurslarından yalnız ixrac məhsulu kimi deyil, həm də iqtisadi dayanıqlığın möhkəmləndirilməsi, xarici siyasət imkanlarının genişləndirilməsi və beynəlxalq tərəfdaşlıqların gücləndirilməsi üçün strateji vasitə kimi istifadə etməyə çalışır. Bu baxımdan ölkənin enerji siyasətinin növbəti mərhələsi məhz mövcud potensialın real iqtisadi və geosiyasi üstünlüyə çevrilməsindən asılı olacaq.
Bölmənin digər xəbərləri
