AZƏRBAYCANIN QADIN GÜLƏŞÇİLƏRİ DÜNYA ÇEMPİONATINDA MÜBARİZƏNİ DAVAM ETDİRİRLƏR
İstanbulda gənclər arasında dünya çempionatında mübarizəyə iyulun 31-də qadın güləşçilər qoşulmuşlar.
Azərbaycan Güləş Federasiyasından AZƏRTAC-a bildirmişlər ki, qadın güləşçilərimizdən ilk olaraq döşək üzərinə Nadya Qradyuk (51 kq) və Sona Əhmədli (59 kq) çıxmışlar.
N.Qradyuk bürünc medal uğrunda təsəlliverici görüşlərə qatılmaq şansı qazanmışdır. Yığmamızın belaruslu legioneri ardıcıl olaraq Qazaxıstan və Türkiyə təmsilçilərini məğlub edərək yarımfinala çıxmışdır. Bu mərhələdə Rusiya idmançısına məğlub olan həmyerlimiz qızıl medal qazanmaq şansını itirmişdir. N.Qradyuk təsəlliverici görüşdə qələbə qazandığı təqdirdə bürünc medal əldə edə biləcəkdir.
Digər idmançımız Sona Əhmədli isə ilk görüşü qələbə ilə başa vursa da, növbəti qarşılaşmada məğlub olmuşdur. S.Əhmədlinin rəqibi finala yüksələ bilmədiyindən o, bürünc medal qazanmaq şansını itirmişdir.
Avqustun 1-də qadın güləşçilərimizdən Əminə Abbasova (48 kq) qüvvəsini sınayacaqdır.
Bölmənin digər xəbərləri
