AZƏRBAYCANIN QADINLARDAN İBARƏT OTÜSTÜ XOKKEY YIĞMASI LİTVADA KEÇİRİLƏN BEYNƏLXALQ TURNİRİN QALİBİDİR
Azərbaycan Otüstü Xokkey Federasiyasından AZƏRTAC-a bildirmişdir ki, qadınlardan ibarət otüstü xokkey yığmamız Litvanın paytaxtı Vilnüsdə keçirilmiş beynəlxalq turnirin qalibi olmuşdur.
Pakistanlı məşqçi Tahir Zamanın rəhbərlik etdiyi yığmamız turnir çərçivəsində Litva və Belarus milliləri ilə görüşmüşdür.
İki dövrəli sistem üzrə təşkil edilən yarışda yığmamız Litva millisini 4:0 və 3:0 hesabları ilə məğlub etmişdir. Belarusla ilk oyunda da qələbə qazanan (4:2) otüstü xokkeyçilərimiz təkrar görüşdə məğlubiyyətlə üzləşmişlər (2:3). Millimiz keçirdiyi görüşlərdən 9 xal toplayaraq birinci yeri tutmuşdur.
Xokkeyçilərimizə kubok və qiymətli hədiyyələr təqdim edilmişdir.
Millimizin keçirdiyi bütün görüşlər avqustun 18-dən 25-dək İngiltərənin Mançestr şəhərində qadınlardan ibarət otüstü xokkey komandaları arasında davam edəcək Avropa çempionatına hazırlıq məqsədi daşıyır.
Azərbaycan komandası bu yarışda güclülər dəstəsində çıxış edəcəkdir.
Bu beynəlxalq turnirdə birinci, ikinci və üçüncü yerləri tutacaq komandalar 2008-ci ildə keçiriləcək Pekin Yay Olimpiya Oyunlarına vəsiqə qazanacaqlar.
Bölmənin digər xəbərləri
