AZƏRBAYCANIN VƏ NİDERLANDIN SƏRHƏD QURUMLARI ARASINDA ƏMƏKDAŞLIQ GENİŞLƏNİR
Dövlət Sərhəd Xidmətinin (DSX) rəisi, general-leytenant Elçin Quliyev iyunun 23-də ölkəmizdə səfərdə olan Niderland Krallığı Ədliyyə Nazirliyinin baş katibi Yoris Demminkin başçılıq etdiyi nümayəndə heyəti ilə görüşmüşdür.
Xidmətin mətbuat mərkəzindən AZƏRTAC-a bildirmişlər ki, görüşdə DSX rəisi tərəfindən Azərbaycanda və regionda geosiyasi vəziyyət, Ermənistanın təcavüzkar siyasətinin Azərbaycanın sərhəd təhlükəsizliyinə mənfi təsiri, işğal nəticəsində 132 kilometr Azərbaycan-İran və 733 kilometr Azərbaycan-Ermənistan sərhədinin nəzarətsiz qalması qeyd edilmişdir. DSX-nin yaranması, görülmüş işlər, aparılan islahatlar haqqında məlumat verilmiş, “Yeni qonşuluq siyasəti” və inteqrasiya edilmiş sərhəd idarəçiliyi üzrə Avropa İttifaqının dəstəyi ilə həyata keçirilən proqramlar çərçivəsində xidmətin qurumla əməkdaşlığının uğurla davam etdirildiyi müsbət qiymətləndirilmişdir.
Görüşdə hər iki qurum arasında ikitərəfli əməkdaşlığın mövcud vəziyyəti və mümkün yeni tərəfdaşlıq sahələri də müzakirə olunmuşdur.
Qonaqlar DSX-nin Heydər Əliyev Elmi Araşdırmalar Mərkəzi, Sərhəd mühafizəsinin tarixi muzeyi və Təlim-Tədris Mərkəzi ilə də tanış olmuşlar.
Niderland Krallığının Ədliyyə Nazirliyinin nümayəndə heyətinin Xarici İşlər, Daxili İşlər, Ədliyyə nazirliklərində və digər qurumlarda da görüşləri nəzərdə tutulmuşdur.
Səfər iyunun 25-də başa çatacaqdır.
Bölmənin digər xəbərləri
