Azərbaycanlı tələbənin məqalələri Norveçin elmi jurnalında dərc edilib
Bakı, 18 aprel, AZƏRTAC
Bakı Dövlət Universitetinin Fizika fakültəsinin fizika müəllimliyi ixtisasının 4-cü kurs tələbəsi Vüsal Abbasov “Norveç inkişaf və elm jurnalı”nda (Norwegian Journal of Development and Science) bir il ərzində 10 məqalə dərc etdirib.
Bu barədə AZƏRTAC-a Vüsal Abbasov məlumat verib. Bu il onun özünə məxsus olan “Kvant Böyük Ölçü nəzəriyyəsi” həmin nəşrdə dərc edilib. Aprel ayında onun həmmüəllif olduğu “Çoxfazalı sistemlərin nəzəriyyəsinin riyazi ifadəsi” məqaləsi də həmin jurnalda çap olunub.
Müəllifin digər məqalələri bunlardır: “M nəzəriyyəsi” (həmmüəllif), “Qeyri-müəyyənlik münasibətləri”, “Qaranlıq maddəyə yeni bir yanaşma” (həmmüəllif), “Simlər nəzəriyyəsi: hadisələrə daha bir yanaşma” (həmmüəllif), “Suyun strukturu və onun struktur temperaturu metodu vasitəsilə öyrənilməsi” (həmmüəllif), “Fəza defekti: fəzalararası maddə axını” (həmmüəllif), “Kainatda səyahətin qısa yolu: kosmik tunellər” “Kvant dolaşıqlığı və simlər nəzəriyyəsi”.
Bu məqalələr üzrə ümumilikdə 1600 yüklənmə olub.
Vüsal Abbasovun sözlərinə görə, həmçinin Kainat nəzəriyyəsi olan “M nəzəriyyəsi”nə aid Azərbaycanda ilk məqaləni o yazıb.
Qeyd edək ki, “Norveç inkişaf və elm jurnalı” dünyanın ən nüfuzlu beynəlxalq indeksləmə bazasında yer alan “Copernicus”, “Journal Factor”, “Calameo”, GIF, “Cosmos”, “Cite Factor” və digər sistemlərdə qeydiyyatdadır. Jurnal, həmçinin Azərbaycan Respublikasının Prezidenti yanında Ali Attestasiya Komissiyasının tövsiyə etdiyi ən nüfuzlu 6 beynəlxalq xülasələndirmə sistemindən birinə - “Copernicus”a daxildir.
Bölmənin digər xəbərləri
