AZƏRTAC-IN FUTBOL KOMANDASI NÖVBƏTİ QƏLƏBƏSİNİ QAZANMIŞDIR
AZƏRTAC xəbər verir ki, Yeni Azərbaycan Partiyası (YAP) Gənclər Birliyinin və ARDNŞ-ın “Neftçi” İdman-Sağlamlıq Mərkəzinin təşkilatçılığı ilə ümummilli lider Heydər Əliyevin 85 illik yubileyinə həsr olunmuş mini-futbol üzrə respublika turniri keçirilir.
Turnirdə YAP Gənclər Birliyi rayon təşkilatlarının mini-futbol komandaları 11 zona üzrə mübarizə aparırlar. Zona yarışlarının qalibləri mayın 2-dən 8-dək Bakıda keçiriləcək final mərhələsində güclərini sınayacaqlar.
YAP Gənclər Birliyi Səbail rayon təşkilatının təşkilatçılığı ilə həmin rayon üzrə keçirilən turnirdə növbəti mərhələnin oyunları olmuşdur. Səbail rayonundakı 2 nömrəli liseyin idman zalında Azərbaycan Dövlət Teleqraf Agentliyinin (AZƏRTAC) futbol komandası Azərbaycan Dövlət Pedaqoji Universitetinin futbolçuları ilə qarşılaşmışdır.
Gərgin idman mübarizəsi şəraitində keçən oyunun əsas vaxtı heç-heçə (9:9) başa çatdığından qalibi müəyyən etmək məqsədilə qapılara penalti təyin olunmuşdur. Bu zərbələri daha dəqiq yerinə yetirən AZƏRTAC-ın komandası 3:2 hesabı ilə qalib gələrək finala vəsiqə qazanmışdır.
Günün digər görüşündə “Bibiheybət” Neft və Qaz Çıxarma İdarəsinin futbolçuları Azərbaycan Dövlət İqtisad Universitetinin (ADİU) komandasını məğlub etmişdir.
Beləliklə, aprelin 11-də keçiriləcək final görüşündə AZƏRTAC və “Bibiheybət” NQÇİ-nin komandaları qarşılaşacaqlar.
Bölmənin digər xəbərləri
