BAKI – ROSTOV–DON – BAKI MARŞRUTU ÜZRƏ YENİ HAVA REYSİ AÇILMIŞDIR
AZƏRTAC xəbər verir ki, iyulun 18-də “Azərbaycan Hava Yolları” Qapalı Səhmdar Cəmiyyəti Bakıdan Rusiyanın Rostov-Don şəhərinə yeni hava reysi açmışdır.
Bu münasibətlə Rostov-Don beynəlxalq hava limanında keçirilən təntənəli mərasimdə Bakıdan gələn ilk sərnişinlər duz-çörəklə qarşılanmışlar.
Hava limanında jurnalistlərə müsahibə verən “AZAL” aviasiya şirkətinin direktor müavini Ələddin Quliyev yeni hava reysinin Rusiya ilə Azərbaycan arasında dostluq əlaqələrinin daha da möhkəmlənməsinə xidmət edəcəyini bildirmişdir. O demişdir ki, hələlik Bakıdan Rostova təyyarə həftədə bir dəfə, cümə günü uçacaqdır. Gələcəkdə sərnişin axını çoxaldıqca reyslərin sayı artırılacaqdır.
Rostov beynəlxalq hava limanı baş direktorunun müavini Georgi Jidkov reysin açılışının əvvəlki ənənələri yenidən bərpa etməyə şərait yaratdığını söyləmişdir. O, bu hava reysinin təşkili üçün uzun müddət hazırlıq görüldüyünü, uçuşların yüksək təhlükəsizlik tədbirləri və keyfiyyəti ilə fərqlənəcəyini bildirmişdir.
Don kazakları mahnı və rəqs ansamblının çıxışının müşayiəti ilə keçən mərasimdə Rostov şəhərində yaşayan Azərbaycan diasporunun nümayəndələri də iştirak etmişlər.
Bakıdan Rostova ilk uçuş 3 saatadək davam etmişdir. Biletin bir tərəfə qiyməti 251 manat, o baş-bu başa isə qiyməti 399 manatdır. Bu istiqamətdə müntəzəm reyslər “ATR-72” və “ATR-42” tipli müasir təyyarələrlə həyata keçiriləcəkdir. Bu təyyarələrin salonu 50-dən 70-dək “ekonom-sinif” sərnişinləri üçün nəzərdə tutulmuşdur.
Bölmənin digər xəbərləri
