BAKI SOS UŞAQ KƏNDİNDƏ “QLOBAL SÜLH OYUNLARI”NIN AÇILIŞ MƏRASİMİ KEÇİRİLMİŞDİR
“SOS Uşaq Kəndləri-Azərbaycan” Assosiasiyasının icraçı direktoru Uğur Zeynallı AZƏRTAC-ın müxbirinə bildirmişdir ki , BMT-nin 2001-2010-cu illəri Sülh və Zorakılıqsız həyat Mədəniyyəti onilliyi elan etməsi ilə əlaqədar, Qlobal Sülh Oyunları keçirilməsi nəzərdə tutulmuşdur. Oyunların məqsədi uşaqlara dünya dostluğu və sülh mədəniyyəti missiyasında öz yerlərini tutmağa və BMT-nin məqsədləri haqda bilik əldə etməyə imkan yaratmaqdır.
“SOS Uşaq Kəndləri-Azərbaycan” Assosiasiyası da cari ildə bu təşəbbüsə qoşulmuşdur. Bakı SOS Uşaq Kəndinin yaxınlığında yerləşən orta məktəblərin komandalarının iştirakı ilə keçirilən turnir sentyabrın 30-da başa çatacaq. Yarış iştirakçıları BMT Baş katibinin İnkişaf və Sülh naminə İdman üzrə xüsusi məsləhətçisi Adolf Oqinin iştirakçılara ünvanladığı müraciəti səsləndirmişlər.
Açılış mərasimində əmək və əhalinin sosial müdafiəsi nazirinin müavini , “SOS Uşaq Kəndləri-Azərbaycan” Assosiasiyasının vitse-prezidenti Tahir Budaqov , Azərbaycan Futbol Federasiyaları Assosiasiyasının mətbuat katibi Məzahir Süleymanov, yarışların keçirilməsinə sponsorluq edən McDonalds şirkətinin , idman qurumlarının və ictimaiyyətin nümayəndələri iştirak etmişlər.
