BAKIDA AVSTRİYA MƏDƏNİYYƏTİ GÜNLƏRİ
Sentyabrın 5-də Azərbaycan paytaxtında Avstriya Mədəniyyəti Günləri başlanmışdır. İçərişəhərdəki Bədii sərgi salonunda Avstriya fotoqraflarının əsərlərindən ibarət sərginin açılış mərasimi olmuşdur.
Mədəniyyət naziri Polad Bülbüloğlu sərgini açaraq xatırlatdı ki, bu ilin yazında Vyanada və Avstriyanın başqa şəhərlərində Azərbaycan mədəniyyəti günləri böyük uğurla keçmişdir. Nümayəndə heyətimizin üzvləri qayğı ilə əhatə olunmuş və bu ölkə sakinlərinin səmimi qonaqpərvərliyini hiss etmişlər.
O, xüsusi vurğuladı ki, Azərbaycan nümayəndə heyəti dövlətimizin başçısı Heydər Əliyevin məktubunu da aparmışdı. Bu məktub əsasında və dövlətimizin başçısına, xalqımıza dərin hörmət əlaməti olaraq, Avstriya hökuməti dahi Azərbaycan şair və mütəfəkkiri Nizami Gəncəvinin “Xəmsə”sinin hazırda Avstriya Milli Kitabxanasının mütəxəssisləri tərəfindən bərpa olunan orijinal əlyazmasını ölkəmizə hədiyyə etməyi qərara almışdır. Elə orada mədəniyyət günləri çərçivəsində Avstriya Milli Kitabxanası ilə M.F.Axundov adına Dövlət Kitabxanası arasında əməkdaşlıq müqaviləsi imzalanmış və müqaviləyə uyğun olaraq, Azərbaycanın 17 mütəfəkkirinin - Nizami, Xaqani Şirvani, Nəsirəddin Tusi, Füzuli və başqalarının Vyanada Milli Kitabxanasında saxlanılan əlyazmalarının surətləri sentyabrın 5-də Bakıya gətirilmişdir. Bundan əlavə, Avstriya nümayəndə heyəti bu ölkədən, onun tarix və mədəniyyətindən bəhs edən 1100 kitabı ölkəmizin baş kitabxanasına hədiyyə gətirmişdir. Nazir hədiyyəyə görə Avstriya nümayəndə heyətinin üzvlərinə, habelə kitabların gətirilməsinin təşkilinə göstərdiyi köməyə görə Vyana bələdiyyəsinin əməkdaşı, milliyyətcə türk olan Heydər Sariyə təşəkkür etdi.
Polad Bülbüloğlu onu da bildirdi ki, Avstriyada bu yaxınlarda baş vermiş təbii fəlakət Azərbaycanın mədəniyyət xadimlərini də dərindən kədərləndirmişdir.
Sonra Vyana bələdiyyəsi mədəniyyət idarəsinin rəisi Berhard Benşerə söz verildi. Qonaq Avstriya nümayəndə heyətinin Bakıya səfərinin təşkilinə köməyə görə Azərbaycanın Mədəniyyət Nazirliyinə, ölkəmizin Vyanadakı səfirliyinə, Avstriya -Azərbaycan Dostluq Cəmiyyətinə təşəkkür edərək dedi ki, belə tədbirlərin keçirilməsi ölkələrimiz və xalqlarımız arasında səmərəli əməkdaşlığın daha da möhkəmlənməsinə təkan verəcəkdir.
Həmin gün qonaqlar Azərbaycan mütəfəkkirlərinin əlyazmalarının surətlərini və Avstriyadan bəhs edən 1100 kitabı M.F.Axundov adına Dövlət Kitabxanasına hədiyyə verdilər. Kitabxananın direktoru Leyla Qafurova hədiyyələrə görə Avstriya nümayəndə heyətinin üzvlərinə səmimi təşəkkürünü bildirdi. O, xüsusi vurğuladı ki, dövlətimizin başçısı Heydər Əliyevin müdrik və uzaqgörən siyasəti sayəsində ölkəmizin beynəlxalq əlaqələri daim genişlənir, möhkəmlənir və Azərbaycan dünya birliyində artıq öz layiqli yerini tutmuşdur.
Sonra mərasimə toplaşan alimlər, tələbələr, paytaxt ictimaiyyətinin nümayəndələri, əcnəbi qonaqlar əlyazmaların surətləri və hədiyyə edilmiş kitablarla tanış oldular.
Bölmənin digər xəbərləri
