BAKIDA DÜNYA TENNİS ASSOSİASİYASININ TURNİRİ KEÇİRİLƏCƏK
Gürcüstan, Rusiya, Belarus, ABŞ, İtaliya, İspaniya, Hindistan, Almaniya, Bolqarıstan, Rumıniya və digər ölkələrin idmançıları mükafat fondu 10 min dollar olan turnirdə iştirak edəcəklərini bildirmişlər. İndiyədək cəmi 42 tennisçinin iştirak edəcəyi məlumdur.
Turnirin direktoru Tatyana Abdulhaqova iştirakçı dövlətlərin coğrafiyasının geniş olmasını Azərbaycanın tennis ənənələrinin dünyada tanınması ilə izah etmişdir. Yarışlarda Azərbaycanın idman şərəfini beynəlxalq görüşlərdə müəyyən təcrübəsi olan ölkə çempionu Elina Həsənova, habelə gənc və perspektivli tennisçilər Sevil Əliyeva və Siyarə Məmmədova qoruyacaqlar.
T.Abdulhaqova Azərbaycan Gənclər və İdman Nazirliyinin və Tennis Federasiyasının apardığı böyük hazırlıq işlərindən də söhbət açmışdır. Yarışların keçiriləcəyi İdman-Tennis kompleksində (“Gənclik” metrosu yaxınlığında) tennis meydançaları yeniləşdirilmiş, təzələri tikilmiş, kompleksin ərazisi abadlaşdırılmış, tamaşaçılar və iştirakçılar üçün hər cür şərait yaradılmışdır. Turnirin direktoru demişdir ki, beynəlxalq tədbir Azərbaycanın idman həyatında əlamətdar hadisə olmaqla yanaşı, bu Olimpiya idman növünün ölkəmizdə təbliğinə və inkişafına da xidmət edəcəkdir.
Bölmənin digər xəbərləri
