AZƏRTAC xəbər verir ki, martın 24-də Heydər Əliyev adına İdman-Konsert Kompleksində “Hindistan şou” sərgisi açılmışdır. Azərbaycan Sənaye və Ticarət Palatasının Hindistanın Ticarətin Təşviqi Təşkilatı ilə birgə təşkil etdiyi sərginin açılış mərasimində palatanın prezidenti Süleyman Tatlıyev çıxış edərək, tədbirin ölkələrimiz arasında ticarət-iqtisadi münasibətlərin inkişafında əhəmiyyətindən danışmışdır. Bildirilmişdir ki, sərgidə Hindistanın toxuculuq, məişət mebeli, əczaçılıq və ərzaq məhsulları, zinət əşyaları istehsal edən 24 şirkəti iştirak edir.
Sonra sərginin açılışını bildirən rəmzi qırmızı lent kəsildi, iştirakçılar ekspozisiyalardakı məhsullarla maraqla tanış oldular.
Sərginin açılış mərasimində Hindistanın ölkəmizdəki səfiri Cyoti Şvarup Pande, bu ölkənin Ticarətin Təşviqi Təşkilatının sərgilər üzrə baş meneceri Pradat Çandra Şarma iştirakçıları maraqlandıran sualları cavablandırdılar.
Sərgi martın 28-dək davam edəcəkdir.
