BAKIDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, fevralın 9-da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.
Suraxanıda “Günəş” ticarət mərkəzindəki yarmarkaya Qobustan, Samux, Daşkəsən, Quba və Biləsuvar rayonlarının fermərləri 23 ton məhsul gətirmişdilər.
Kənd Təsərrüfatı Nazirliyinin nümayəndəsi Mustafa Rüstəmovun verdiyi məlumata görə, əhalinin tələbatı nəzərə alınaraq bu dəfə satışa çıxarılan məhsulların miqdarı və çeşidi artırılmışdır. Satılan məhsulların qiymətləri bazardakından 25-30 faizə qədər ucuzdur. Alıcılar məhsulların qiymətindən və keyfiyyətindən razılıq edirlər.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad və Göyçay rayonunun fermerləri sakinlərə 4 ton məhsul təklif edirdilər.
A.Şərifzadə küçəsi, 194, metronun “İnşaatçılar” stansiyasının yaxınlığındakı yarmarkada paytaxt sakinləri mal və qoyun ətini, yumurtanı, ağartını, alma, naringi, nar, kök və digər meyvə-tərəvəzi həvəslə alırdılar.
Yarmarkaya Salyan, Qusar, Dəvəçi, Astara və digər rayonlardan 54 tondan çox müxtəlif çeşidli kənd təsərrüfatı məhsulları gətirilmişdi. Qusarlı Hamlet Nəcəfov dedi ki, hər həftə paytaxta kələm, kök və kartof gətirir. Son zamanlar beş tondan çox məhsul satmışdır.
Alıcı Sona Bağırovanın sözlərinə görə, alış-veriş üçün bura gəlməsinin səbəbi qiymətlərin bazardakından 30-40 faiz aşağı, keyfiyyətin yüksək olmasıdır. Yarmarkada kartofun kiloqramı 30-60, soğan, kələm 30 qəpiyə, nar 1 manata, naringi 1 manat-1manat 20 qəpiyə, mal əti 3 manat 60 qəpiyə, qoyun əti 4 manat 20 qəpiyə təklif edilirdi.
Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada satışa Saatlı, Salyan, Masallı rayonlarından gətirilmiş 11 tondan çox məhsul çıxarılmışdı.
Masallıdan gəlmiş Qasım Balayev dedi ki, bura 2 tona yaxın kartof gətirib. Qısa müddətdə onun 500 kiloqramını satmışdır.
Alıcılar yaradılmış şəraitdən, qiymətlərin ucuzluğundan və məhsulların keyfiyyətindən razılıq edirdilər.
Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzində Salyan, Kürdəmir, Quba, Ağcabədi, Qax, Biləsuvar və Qəbələ rayonlarının fermerləri alıcılara meyvə-tərəvəz, bostan bitkiləri, konserv məhsulları, ət və ağartı təklif edirdilər.
Kənd Təsərrüfatı Nazirliyinin nümayəndəsi Rafiq Nəcəfovun bildirdiyinə görə, bu gün yarmarkada satışa 109,1 ton kənd təsərrüfatı məhsulu çıxarılmışdır. Qiymətlər bazardakından 30 faiz aşağıdır. Məhsul gətirənlər arasında Kürdəmir fermerləri fərqlənirlər. Onlar bakılılara 3 ton kələm, 4 ton kartof, 6 ton meyvə və s. təklif edirdilər.
Nərimanov rayonu, Keşlə ticarət mərkəzində təşkil olunmuş yarmarkada Xaçmaz, Tərtər, İmişli, Tovuz, Astara, Beyləqan, Daşkəsən, Neftçala, Oğuz və Qobustan rayonlarının fermerləri meyvə-tərəvəz, ət-süd məhsulları, Buzovna, Mərdəkan, Giləzi, Goradil broyler fabriklərinin təmsilçiləri quş əti və yumurta satırdılar. Burada mal ətinin kiloqramı 3 manat 60 qəpiyə, qoyun əti 4 manata, quş əti 2 manat 70 qəpiyə, soğan 20, kök 50, çuğundur və alma 40, armud 80, kartof 40-50, mandarin 80 qəpiyə, yumurtanın bir ədədi 8 qəpiyə idi.
Astara rayonunun Ucakərən kəndindən Firdovsi Əmirov şəxsi fermer təsərrüfatından 2,5 ton sitrus meyvələri gətirmişdi.
Kənd Təsərrüfatı Nazirliyinin nümayəndəsi Fərhad Eminovun verdiyi məlumata görə, bu gün satışa 107 ton meyvə-tərəvəz, 1,5 tondan çox toyuq əti, 15 min ədəd yumurta çıxarılmışdır. Xaçmaz (44 ton) və Tərtər (41 ton) rayonlarının fermerləri alıcılara daha çox məhsul təklif edirlər.
Bölmənin digər xəbərləri
