Bakı, 30 oktyabr (AZƏRTAC). Oktyabrın 30-da Azərbaycan Respublikası Dövlət Neft Şirkətinin (ARDNŞ) “Neftqazelmitədqiqatlayihə” İnstitutunun və Norveçin “Statoil” şirkətinin birgə təşkilatçılığı ilə “Ofşor texnologiyalarında son nailiyyətlər, neft hasilatının artırılması” mövzusunda seminar keçirilmişdir.

AZƏRTAC xəbər verir ki, seminarda çıxış edən ARDNŞ-in birinci vitse-prezidenti, akademik Xoşbəxt Yusifzadə Azərbaycanda Norveç günlərinin keçirilməsinin əhəmiyyətindən danışmış, ölkəmizin neft sənayesinin tarixi, Xəzərin quruda və dənizdə olan neft və qaz yataqları haqqında məlumat vermişdir.

Bildirilmişdir ki, Azərbaycanda neft ilk dəfə neft 1847-ci ildən mexaniki üsulla qazılmış quyulardan hasil edilmişdir. 1847-1848-ci illərdə ilk dəfə Bibiheybət və sonra Balaxanı yataqlarında mexaniki üsulla qazılmış quyulardan sənaye əhəmiyyətli neft alınmış və həmin dövrdən Azərbaycanda neft sənayesinin əsası qoyulmuşdur. Bu inkişaf nəticəsində 1901-ci ildə Azərbaycanda 11 milyon ton hasil edilmişdir ki, bu da dünya neft hasilatının 50 faizdən çoxunu təşkil etmişdir. 1941-ci ildə Azərbaycan neftçiləri tərəfindən rekord miqdarda - 23,5 milyon ton neft hasil edilmişdir. Bu rəqəm həmin dövrdə Sovet İttifaqında çıxarılan neftin 76 faizi demək idi. 1949-cu ildə isə “Neft daşları”nda 942 metr dərinlikdə qazılan gündəlik hasilatı 100 tondan çox olan 1 nömrəli quyu qazılmışdır. Bu yataq dünyada açıq dənizdə kəşf edilmiş ilk yataq olaraq tarixə düşmüş, bununla da Azərbaycanda dəniz neft sənayesinin inkişafı başlamışdır.

Qeyd olunmuşdur ki, bu günədək Azərbaycanda 75 müxtəlif neft və qaz yatağı kəşf edilmişdir ki, onlardan 49-u quruda, 26-sı isə dənizdə yerləşir. Sentyabr ayının 1-nə olan məlumata əsasən, ölkəmizdə 1 milyard 815 milyon ton neft və 585 milyard kubmetr qaz hasil edilmişdir.

Sonra Norveç Krallığının ölkəmizdəki səfiri Erlinq Şönsberq çıxış edərək seminarın əhəmiyyətindən danışmış və iştirakçılara uğurlar arzulamışdır.

“Statoil” şirkətinin Azərbaycandakı nümayəndəsi Tanguy Cosmoa və “İNTSOK” şirkətinin regional direktoru Haakon Skrettinq Norveçin neft və qaz sənayesi haqqında təqdimatla çıxış etmişlər.

Seminar Norveçin müxtəlif şirkətlərinin nümayəndələrinin təqdimatları ilə davam etdirilmişdir. Məruzələr ətrafında fikir mübadiləsi aparılmışdır.