Bakıda “Potensial 2” dekorativ-tətbiqi sənət festivalı keçirilmişdir
Bakı, 12 noyabr (AZƏRTAC). Noyabrın 12-də Azərbaycan Respublikasının Prezidenti yanında Gənclər Fondunun maliyyə dəstəyi ilə “Arts Council Azerbaijan” (“Azərbaycan İncəsənət Konsulluğu”) qeyri-hökumət təşkilatının dekorativ-tətbiqi sənət bölməsi tərəfindən “Art Villa” qalereyasında “Potensial 2” dekorativ-tətbiqi sənət festivalı keçirilmişdir.
AZƏRTAC xəbər verir ki, tədbirdə festival haqqında geniş məlumat verilmişdir.
Bildirilmişdir ki, Üzeyir Hacıbəyli adına Bakı Musiqi Akademiyasının tələbələrinin də qatıldığı festivalda batika, qobelen, keramika, şəbəkə, zərgərlik, xalça növlərinə aid əsərlər nümayiş etdirilir.
Vurğulanmışdır ki, xalq musiqisi sədaları altında keçirilən festivalın məqsədi dekorativ-tətbiqi sənət növlərini təbliğ etmək, gənc nəsildə ona qarşı maraq yaratmaq, bu milli sənət növlərinin inkişafına kömək göstərmək, böyük potensiala malik yaradıcı insanları kəşf etməkdir.
Diqqətə çatdırılmışdır ki, gənc nəslin incəsənətə olan marağını daha da artıracaq bu festival Azərbaycan sənətkarlarını tanımaq və tanıtdırmaq baxımından da böyük məna kəsb edir.
Bölmənin digər xəbərləri
