BAKIDA QUŞÇULUQ MƏHSULLARININ NÖVBƏTİ YARMARKASI KEÇİRİLƏCƏK
AZƏRTAC xəbər verir ki, İqtisadi İnkişaf Nazirliyi və Quşçular Cəmiyyətinin təşkilatçılığı ilə quş əti və yumurta satışı üzrə yarmarkaların keçirilməsi davam etdirilir.
Əhalinin bu məhsullara tələbatının daha dolğun ödənilməsi və qiymətlərin süni şəkildə artırılmasının qarşısının alınmasında əhəmiyyətli olan bu cür növbəti yarmarka fevralın 23-də keçiriləcəkdir.
Quş əti və yumurta satışı yarmarkaları “Təzə bazar” və 3-cü mikrorayon bazarı ilə yanaşı, Sabunçu bazarında da təşkil ediləcəkdir. Quşçuluq təsərrüfatlarının yarmarkalara 500 min ədədə yaxın yumurta və 22-25 ton quş ətinin çıxaracağı gözlənilir.
Yarmarkalarda alıcılara keyfiyyətli və bazar qiymətlərindən ucuz mallar təklif olunacaqdır. Yumurtanın 1 ədədi üçün 6-10 qəpik, keyfiyyətli quş ətinin hər kiloqramı üçün 2 manat 60 qəpik qiymət müəyyənləşdirilmişdir.
Bundan əlavə, fevralın əvvəlindən “Təzə bazar”dakı 6 mağazada quş əti və yumurta satışı üzrə daimi (həftənin bütün günlərində) yarmarka fəaliyyət göstərir. Yaxın vaxtlarda Sabunçu bazarında da həftənin bütün günlərində işləyəcək yarmarka fəaliyyətə başlayacaqdır.
Bölmənin digər xəbərləri
