Bakıda “Sağlamlıq hüquqlarının təmin edilməsi” mövzusunda seminar keçirilmişdir
Bakı, 10 iyul (AZƏRTAC). İyulun 10-da Səhiyyə Nazirliyinin İctimai Səhiyyə və İslahatlar Mərkəzində (İSİM) “Sağlamlıq hüquqlarının təmin edilməsi” mövzusunda seminar keçirilmişdir.
AZƏRTAC xəbər verir ki, seminarda yerli mütəxəssislərlə yanaşı, Malta, Niderland və digər ölkələrin də ekspertləri iştirak etmişlər. Seminar “Açıq Hökumətin təşviqinə dair 2012-2015-ci illər üçün Milli Fəaliyyət Planı”nın icrası üzrə Səhiyyə Nazirliyinin fəaliyyətini tənzimləyən qanunvericilik aktları barədə məlumatların vətəndaşlar arasında təşviqinin təkmilləşdirilməsi məqsədi ilə təşkil edilmişdir.
Tədbirdə çıxış edən İSİM-in direktoru Ceyhun Məmmədov əhalinin səhiyyə maarifi işinə cəlb olunmasının əhəmiyyətindən danışmışdır. Qeyd etmişdir ki, ölkəmizdə əhalinin sağlamlıq vəziyyətinin yaxşılaşdırılması ilə bağlı bir sıra mühüm işlər aparılır, müxtəlif dövlət proqramları həyata keçirilir. Son zamanlar həkim-pasiyent ünsiyyəti və bu prosesdə qarşıya çıxan problemlər əsas müzakirə olunan mövzulardandır. Tibb mütəxəssisləri ilə pasiyentlər arasında münasibət qanun çərçivəsində tənzimlənir. Bu mənada pasiyent hüquqlarının qorunması aktual problem kimi diqqət mərkəzindədir. Azərbaycanda “Pasiyentin hüququ haqqında” qanunun layihəsi Milli Məclisin gündəliyindədir və mütəmadi olaraq müzakirə olunur.
Diqqətə çatdırılmışdır ki, Azərbaycan qanunvericiliyində əhalinin sağlamlıq hüquqları Konstitusiyanın 41-ci maddəsi və 1997-ci ildə qəbul edilmiş baş səhiyyə qanunu - “Əhalinin sağlamlığının qorunması haqqında” qanunla qorunur. Qanunda əhalinin sağlamlığının qorunması sahəsində insan və vətəndaş hüquqlarına dövlət təminatı və bu təminatla bağlı hüquqi və fiziki şəxslərin məsuliyyəti, tibbi-sosial yardımın hamı üçün mümkünlüyü, sağlamlığın qorunması sahəsində profilaktik tədbirlərin həyata keçirilməsi və s. məsələlər öz əksini tapmışdır. Qanunda pasiyentlərin hüquqları ilə bağlı xüsusi maddə yer almışdır. Həmin maddədə qeyd olunur ki, təxirəsalınmaz tibbi yardım göstərilməsi halları istisna olmaqla, pasiyentin öz razılığı ilə həkimi və müalicə müəssisəsini seçmək, sanitariya-gigiyena tələblərinə uyğun olan şəraitdə müayinə və müalicə olunmaq, stasionar müalicə olunduğu tibb müəssisəsinin mütəxəssislərinin iştirakı ilə konsilium və məsləhətləşmələr aparılmasını tələb etmək, tibbi müdaxiləyə şifahi və ya yazılı könüllü razılıq vermək və s. hüquqları vardır. Qanunda göstərilir ki, pasiyentin hüquqları pozulduqda, o, müalicə olunduğu tibb müəssisəsinin rəhbərliyinə, Səhiyyə Nazirliyinə və ya hüquq-mühafizə orqanlarına müraciət edə bilər.
Seminarda Avropa Şurasının dəstəyi ilə hazırlanmış “Sağlamlığın mühafizəsi hüququ barədə vətəndaş məsləhəti platforması” modelinin təqdimatı olmuşdur.
Bildirilmişdir ki, Avropa Şurası ilə əməkdaşlığa səhiyyə sahəsində Sosial Birlik üzrə Avropa Komitəsinin həyata keçirdiyi “Sağlamlığın qorunması hüququ üzrə vətəndaş məsləhəti haqqında” sorğunun cavablandırılması ilə başlanılmışdır. 18 ölkədən əldə olunan sorğu nəticələri əsasında hazırlanan “Sağlamlığın mühafizəsi hüququ barədə vətəndaş məsləhəti platforması” modeli əhalinin səhiyyə maarifi işinə cəlb olunmasında əhəmiyyətli model hesab edilir.
Modeldə sağlamlığın mühafizəsi hüququ barədə vətəndaş məsləhətinin əsas istiqamətləri və detalları əks olunmuşdur. Ən əsası isə bütün maraqlı tərəflərin qarşılıqlı və effektiv fəaliyyəti üçün zəruri olan istiqamətlər ardıcıllıqla bu modeldə göstərilmişdir.
Bölmənin digər xəbərləri
