BAKIDA TAEKVONDO ÜZRƏ OLİMPİYA LİSENZİYA TURNİRİ BAŞLANMIŞDIR

21.02.2004 [12:52]
Çap et
A⁺ A^-

Fevralın 21-də Bakı İdman sarayında taekvondo üzrə Avropa təsnifat turniri başlanmışdır. Turnirdə Avropanın 39 ölkəsindən 268 idmançı iştirak edir. Qitənin ən güclü komandası sayılan Azərbaycan yığma komandasını turnirdə 2001-ci ilin dünya çempionu Niyaməddin Paşayev (68 kq), habelə Aygün Əliyeva (49 kq), Aynurə Məmmədova (57 kq) təmsil edirlər. Turnirin şərtlərinə görə, hər çəki dərəcəsində üç olimpiya lisenziyası verilir.

Azərbaycan taekvondoçuları 2004-cü ildə Afinada keçiriləcək Olimpiadaya hələlik bir vəsiqə qazana bilmişlər. Rəşad Əhmədov (80 kq) Parisdə lisenziyalı dünya çempionatında üçüncü yer tutaraq, Yunanıstana vəsiqə almış ilk taekvondoçu olmuşdur. R.Əhmədov hələlik MDB məkanında bu növdə lisenziya qazanmış yeganə idmançıdır.

Olimpiadada taekvondo üzrə yarışlarda hər ölkə yalnız 4 taekvondoçu – iki kişi və iki qadın ilə təmsil oluna bilər. Artıq 28 idmançı olimpiya lisenziyası qazanmışdır. Qalanları isə qitə təsnifat yarışlarında bəxtlərini sınayacaqlar. Avropa, Asiya və Amerikanın hər birinə 24, Afrikaya isə 16 yer ayrılmışdır. Afinada ümumən 124 taekvondçu çıxış edəcəkdir.

İndiyə qədər yalnız Koreya komandası dörd lisenziya qazanmışdır. Fransa və İtaliya komandalarının hər birinin üç lisenziyası vardır. Odur ki, bu ölkələr Bakıda bir taekvondoçu ilə təmsil olunacaqdır.

BAKIDA TAEKVONDO ÜZRƏ OLİMPİYA LİSENZİYA TURNİRİ BAŞLANMIŞDIR

MÜƏLLİFLƏ ƏLAQƏ

Bölmənin digər xəbərləri