“BAKUTEL-2004” SƏRGİSİNƏ HƏSR OLUNMUŞ MƏTBUAT KONFRANSI

28.09.2004 [17:57]
Çap et
A⁺ A^-

AZƏRTAC xəbər verir ki, sentyabrın 29-da Bakıda, Heydər Əliyev adına İdman-Konsert Kompleksində açılacaq “BAKUTEL-2004” 10-cu Azərbaycan beynəlxalq telekommunikasiya və informasiya texnologiyaları sərgisi ilə əlaqədar Beynəlxalq Mətbuat Mərkəzində mətbuat konfrans keçirilmişdir.

Böyük Britaniyanın İTE Group PİC və onun Qafqazdakı eksklüziv tərəfdaşı “İteca Caspian” şirkətlərinin təşkilatçılığı ilə keçiriləcək sərgidə dünyanın 16 ölkəsindən 92 şirkət təmsil olunacaqdır.

Rabitə və İnformasiya Texnologiyaları Nazirliyinin və sərgi təşkilatçılarının nümayəndələri bildirmişlər ki, yubiley sərgisində telekommunikasiya və informasiya texnologiyaları sahəsində fəaliyyət göstərən bütün aparıcı şirkətlərlə yanaşı, ölkə bazarına ilk dəfə qədəm qoyan yeni xarici müəssisələr də iştirak edəcəklər. Ekspozisiyaların 60 faizi Azərbaycan şirkətlərinin payına düşəcək ki, bu da son illərdə respublikamızda elmi-texniki tərəqqinin, telekommunikasiya və informasiya texnologiyaları sahəsinin yüksək inkişafını göstərir.

Sərgi çərçivəsində aktual məsələlərə, yeni layihələrə həsr olunmuş sessiyaların və “dəyirmi masa”ların keçirilməsi də nəzərdə tutulmuşdur.

Sonda jurnalistlərin suallarına cavab verilmişdir.