Balakən rayonunun təsərrüfatlarında qarğıdalı yığımına başlanılıb
Balakən, 9 avqust, Mustafa Dadaşov, AZƏRTAC
Balakənli fermerlər bu il 7 min 577 hektar sahədə qarğıdalı yetişdiriblər. Qarğıdalı bitkisinin əkin sahəsi ötən illə müqayisədə 62 hektar artırılıb. Bundan əlavə, təsərrüfatçılar bu il 336 hektar sahədə dən üçün təkrar qarğıdalı da əkiblər. Artıq rayonun bəzi təsərrüfatlarında qarğıdalı yığımına da başlanılıb. İlk günlər 45 hektar sahənin məhsulu yığılıb, 135 ton dən qarğıdalı istehsal olunub. Hələlik hər hektardan orta məhsuldarlıq 30 sentner təşkil edir.
Bu barədə AZƏRTAC-ın bölgə müxbirinə Balakən Rayon Statistika İdarəsindən məlumat verilib.
Bildirilib ki, hazırda təsərrüfatlarda kartof, tərəvəz və bostan bitkilərinin yığımı da davam edir. İndiyədək kartof əkilmiş 615 hektar sahənin 609 hektarında yığım başa çatıb, 5 min 898 ton məhsul tədarük olunub. Hər hektardan məhsuldarlıq 96,8 sentner təşkil edir. Eyni zamanda, tərəvəz əkilmiş 2008 hektar sahənin 1516,9 hektarının məhsulu yığılıb, 21 min 376 ton tərəvəz istehsal olunub. Məhsul istehsalı ötən ilin eyni dövrü ilə müqayisədə 947 ton artıb. Torpaq mülkiyyətçiləri indiyədək 3 min 395 ton bostan bitkiləri istehsal ediblər.
Bölmənin digər xəbərləri
