“BANK STANDARD” İLİN BİRİNCİ YARISINA YEKUN VURMUŞDUR
AZƏRTAC xəbər verir ki, iyulun 30-da “Bank Standard”ın mərkəzi ofisində ilin birinci yarısının maliyyə yekunlarına həsr olunmuş mətbuat konfransı keçirilmişdir.
Tədbirdə bankın idarə heyəti sədrinin birinci müavini Cavid Quliyev və Müştəri xidmətləri departamentinin direktoru Cahangir Axundov çıxış etmişlər. Bildirilmişdir ki, hesabat dövründə aktivlər ötən ilin eyni dövrü ilə müqayisədə 58 faiz, kreditlərin məbləği 64 faiz, müştəri hesablarında olan vəsaitlər 26 faiz artaraq müvafiq surətdə 712,3 milyon, 439,1 milyon, 250,9 milyon manat, depozit portfeli isə 108,3 milyon manat olmuşdur. Bu dövrdə bankın əldə etdiyi xalis mənfəət (vergi tutulduqdan sonra) 8,7 milyon manatdır.
Bankın ümumi kapitalı aprel ayının sonuna 103,8 milyon ABŞ dollarına çatmışdır. Beləliklə, “Bank Standard” ümumi kapitalı 100 milyon dolları keçmiş ilk yerli özəl bank olmuşdur.
Bankın aktiv kartlarının sayı 20 min 419 ədəd təşkil etmişdir. Hazırda qurumun POS-terminallarının sayı 278-ə, ATM-bankomatlarının sayı 40-a, filiallarının ümumi sayı 15-ə çatmış bankın yaxın gələcəkdə regionlarda daha bir neçə filialının açılması nəzərdə tutulmuşdur.
Hesabat dövründə Qara dəniz Ticarət və İnkişaf Bankından 8 milyon dollar məbləğində kredit xətti cəlb olunmuşdur. Vəsait Azərbaycanın özəl sektorunda fəaliyyət göstərən şirkətlərin əməliyyatlarının maliyyələşdirilməsinə yönəldiləcəkdir.
Sonda KİV nümayəndələrinin sualları cavablandırılmışdır.
