Belarus və Azərbaycanın strateji tərəfdaş olması biznes əlaqələri üçün geniş imkan yaradır
Bakı, 13 may, AZƏRTAC
Azərbaycan Prezidenti İlham Əliyevin rəhbərliyi ilə Qarabağın azad edilməsi ölkəmizin beynəlxalq aləmdəki nüfuzunu daha da möhkəmləndirib ki, bu da iş adamlarına və biznes strukturlarına daha geniş formada əməkdaşlıq əlaqələri qurmağa imkan yaradıb.
Bu sözləri AZƏRTAC-a açıqlaması zamanı Belarus Universal Əmtəə Birjasının (BUƏB) Bakıda keçirdiyi seminarda iştirak edən “Nuray Parfums” şirkətinin direktoru Əfruz Elyazova deyib. O bildirib ki, Belarus və Azərbaycan strateji tərəfdaş dövlətlərdir və bu vəziyyət iş adamlarına qarşılıqlı faydalı əlaqələr qurmaq üçün geniş şərait yaradır. BUƏB-nin Bakıda keçirdiyi seminar hər iki ölkədə fəaliyyət göstərən biznes qurumlarının bir-birilərini tanımaq üçün münbit platforma təşkil edib. Bu platformadan tərəflər istifadə edərək biznesi genişləndirmək mümkündür.
“Belarusla əlaqələr qurub şirkətin fəaliyyət sahəsini daha da genişləndirmək istəyirik. Belarusdan şəkər çuğundurunu birja vasitəsi ilə alıb üçüncü tərəfə satmaq və istehsal prosesində istifadə etməyi planlaşdırırıq. Eyni zamanda, biz istehsal etdiyimiz parfum məhsullarını Belarusa ixrac etmək istəyirik. Belarusda trikotaj malları istehsalı da inkişaf edib və biz onlara xam mal kimi pambıq və pambıq lifləri də ixrac etməyi düşünürük. Bunları həyata keçirmək üçün bu kimi seminarda tərəfdaşlarla əlaqə saxlayırıq. Bu mallara Belarusda tələbat var. Belarus və Azərbaycanın həm də təhsil və başqa sahələrdə də əməkdaşlıq etmək potensialı var və biz bunları araşdırıb Belarus bazarına daxil olaraq faydalı əməkdaşlıq əlaqələri quracağıq”, - deyə direktor nəzərə çatdırıb.
Bölmənin digər xəbərləri
