BƏLƏDİYYƏ TEATRI MÖVSÜMÜ AÇMIŞDIR
Sentyabrın 16-da Bakı Bələdiyyə Teatrı C.Məmmədquluzadənin “Ölülər” komediyası ilə 11-ci mövsümünü açmışdır.
Noyabr ayında yaranmasının 10 illik yubileyi qeyd olunacaq teatr ötən dövr ərzində “Tomriis”, “Nadir Şah”, “Dəli Domrul”, “Dönüş”, “Domokl qılıncı” və s. tamaşaları ilə böyük rəğbət qazanmışdır.
Rejissor Oruc Qurbanovun quruluş verdiyi “Ölülər” tamaşasında baş rolları aktyorlar Azad Şükürov (Şeyx Nəsrullah), Elxan Rzayev (İsgəndər), Arzu Şuşanova (Nazlı) böyük məharətlə ifa etdilər. Əməkdar artist Vaqif Əliyevin, Mahirə Yaqubova, Tofiq Bayramov, Rafiq İbrahimov və başqa aktyorların çıxışları da maraqla qarşılandı.
Teatrın bədii rəhbəri və direktoru, xalq artisti, Milli Məclisin deputatı Amalya Pənahova AZƏRTAC-ın müxbirinə bildirmişdir ki, bu mövsümdə bir çox maraqlı tamaşaların, o cümlədən Sofoklun “Elektra” və H.Cavidin “İblis” faciələrinin də səhnəyə qoyulması nəzərdə tutulmuşdur.
Bölmənin digər xəbərləri
