Beynəlxalq konqresdə Azərbaycanda gender bərabərliyi sayəsində görülən işlərdən danışılıb
Bakı, 6 noyabr, AZƏRTAC
Türkiyədə Qadın və Demokratiya Təşkilatının (KADEM) “Vətəndaş cəmiyyəti və qadın” mövzusunda 9-cu Qadın Araşdırmaları Konqresi keçirilib. Konqres qadınların ictimai həyata və sosial inkişafa verdiyi töhfələrin müzakirəsinə həsr edilib.
AZƏRTAC xəbər verir ki, tədbirdə ölkəmizi “Qlobal Əməkdaşlıq və Analitik Araşdırmalar Mərkəzi” İctimai Birliyinin sədri, sosial elmlər üzrə fəlsəfə doktoru Xəyalə Məmmədova təmsil edib.
Konqresin açılış mərasimində qadınlara qarşı zorakılığın bütün formalarına qarşı mübarizə aparıldığı, bu istiqamətdə mühüm layihələr, həyata keçirildiyi diqqətə çatdırılıb. Bildirilib ki, KADEM 53 təmsilçisi ilə Türkiyənin bütün bölgələrindən olan qadınlara dəstək göstərir, mühüm mövzuları beynəlxalq platformalara daşıyır, qadınların problemlərinin regional və qlobal həll yollarını tapmağa çalışır.
Konqresin gedişində “Tarixdə qadın təşkilatlarının vətəndaş cəmiyyəti fəaliyyəti”, “Vətəndaş cəmiyyəti və psixologiya”, “Türkiyədə qadınların qeyri-hökumət təşkilatlarında yeri”, “Dünyada qadın yönümlü vətəndaş cəmiyyəti strukturları”, “Siyasət, dövlət və vətəndaş cəmiyyəti”, “Vətəndaş cəmiyyəti və kommunikasiya”, “Qadınların təhsilində qeyri-hökumət təşkilatlarının rolu”, “Sosial həyatda qadın və ailə” və digər mövzularda müzakirələr aparılıb.
Tədbirdə Xəyalə Məmmədova KADEM-in rəhbər heyətində təmsil olunan Ümit Atmanla birgə hazırladığı “Azərbaycanda qadın hərəkatları və vətəndaş cəmiyyəti” mövzusunda məruzə ilə çıxış edərək, Azərbaycanda vətəndaş cəmiyyətinin formalaşması tarixindən və bu istiqamətdə görülən işlərdən danışıb. Ümummilli Lider Heydər Əliyevin qadın siyasətinə, gender bərabərliyinə böyük önəm verdiyini, qadınların elm, təhsil, mədəniyyət sahələrində fəallığının artırılmasına diqqət yetirdiyini bildirən X.Məmmədova bu siyasətin Prezident İlham Əliyev tərəfindən uğurla davam etdirildiyini vurğulayıb. Bildirilib ki, Azərbaycanda bu sahənin inkişafı ilə bağlı qanunvericilik təkmilləşdirilib və institusional mühit yaradılıb.
“Dövlətimizin başçısının dəstəyi ilə qeyri-hökumət təşkilatları və dövlət qurumları arasında sıx əlaqələrin, qarşılıqlı etimadın sayəsində mühüm uğurlar əldə olunub. Milli müstəqillik və dövlətçilik ideyaları ətrafında sıx birləşən Azərbaycan qadınları bu gün də dövlət quruculuğunda, ölkənin ictimai-siyasi həyatında fəal iştirak edərək, Vətənimizin sosial-iqtisadi, elmi-intellektual potensialının artırılmasına, mədəniyyətimizin inkişafına layiqli töhfələrini verirlər”, - QHT rəhbəri diqqətə çatdırıb.
Ölkəmizdə qadın siyasəti sahəsində görülən işlərdə Azərbaycanın Birinci vitse-prezidenti Mehriban xanım Əliyevanın zəngin fəaliyyətini qeyd edən Xəyalə Məmmədova birinci xanımın xeyirxah əməlləri, təşəbbüsləri ilə bütün dünyada müasir Azərbaycan qadınının obrazını təcəssüm etdirdiyini vurğulayıb.
Qeyd edək ki, Süməyyə Erdoğan Bayraktarın rəhbərlik etdiyi KADEM ( Qadın və Demokratiya ) 2013-cü ildən fəaliyyət göstərir. Qadın hüquqlarının müdafiəsi üçün yaradılmış qurum “varlıqda bərabərlik, məsuliyyətdə ədalət” prinsipini əsas tutur. Beynəlxalq arenada geniş fəaliyyət göstərən KADEM təşkilatı qadın araşdırmaları və problemlərini beynəlxalq platformalara da daşıyır.
Bölmənin digər xəbərləri
