Beynəlxalq Sahilyanı Təmizlik Günü toplanmış tullantılar təkrar emala göndəriləcəkdir
Bakı, 19 sentyabr (AZƏRTAC). Beynəlxalq Sahilyanı Təmizlik Gününün 27-ci ildönümü ilə əlaqədar sentyabrın 22-də Xəzər rayonunun Şüvəlan qəsəbəsində “Zibili götür, təmizlə, fərqi gör!” devizi altında ekoloji tədbir keçiriləcəkdir.
Bu ekoloji təşəbbüsə “Təmiz Şəhər” Açıq Səhmdar Cəmiyyəti (ASC) də qoşulacaqdır.
“Təmiz Şəhər” ASC-dən AZƏRTAC-a bildirmişlər ki, Beynəlxalq Sahilyanı Təmizlik Günü sahillərin, daxili suların və okeanların məişət tullantıları və zibildən təmizlənməsi məqsədilə dünyada keçirilən birgünlük könüllülük təşəbbüsüdür.
Aksiya zamanı Şüvəlan sahili zibil və tullantılardan təmizlənəcəkdir. Toplanmış bütün tullantılar sınaq rejimində fəaliyyət göstərən Bərk məişət tullantılarının çeşidlənməsi zavodunda çeşidlənərək təkrar emala göndəriləcəkdir.
Dövlət və qeyri-hökumət təşkilatlarının nümayəndələri də bu təşəbbüsə qoşulacaqlar.
“Coca-Cola” şirkəti bütün iştirakçıları nəqliyyatla, köynəklərlə, sərinləşdirici içki ilə, naharla və təmizlik üçün lazımi avadanlıqla təmin edəcəkdir.
Bölmənin digər xəbərləri
